«Jetisy Media» ақпараттық алаңында «Аз қамтылған және көп балалы отбасыларға арналған «Жанұя» әлеуметтік орталығының қызметі» тақырыбында баспасөз мәслихаты ұйымдастырылды. Алматы облысының әйелдерді қолдау орталығының президенті Жанар Нұрмұханова, Талдықорған қалалық жұмыспен қамту, әлеуметтік бағдарламалар және азаматтық хал актілерін тіркеу бөлімі басшысының орынбасары  Айгерім Омарова,  «Жанұя» әлеуметтік орталығының өкілі  Мадина Белгібаева   атқарылған жұмыстар турасында мәлімет берді.

— Президенттің тапсырмасына сәйкес  осы жылдың басында  Талдықорған қаласында  «Жанұя»  әлеуметтік орталығы ашылған болатын.  Орталық бір терезе қағидаты бойынша жұмыс жасайды. Бұл жерде мамандар әлеуметтік  жағынан аз қамтылған, қиын жағдайға тап болған отбасы мүшелеріне көмек қолын созады. Негізінен, қолданыстағы әлеуметтік бағдарламалар туралы хабардар етеді және қажетті құжаттарды дайындауға көмектеседі. Бүгінде орталық   құқықтық, психологиялық кеңестер және  мемлекет тарапынан көрсетілетін әлеуметтік көмектер турасында  тұрғындарға толық мәлімет береді.   Келушілер заңгерлік, психологиялық кеңестер алып қана қоймай, оңалту көмегін де алады.  Орталықтың қызметі негізінен әлеуметтік осал отбасылардың өмір сүру сапасын арттыруға, азаматтардың өмірлік қиын жағдайдан шығуына жәрдемдесу,-дейді Жанар Болатқызы.

Спикерлердің айтуынша,  жұмыссыз  азаматтардың кәсіби оқуына да көңіл бөлініп отыр. Олар  аспаз, кулинар,  визажист, тігінші мамандықтарына оқуға жіберілген. Оны бітіргендер жеке кәсіп алуға да ұмтылады. Осылайша, мемлекет тарапынан жасалып жатқан көмекті алушылар қатары көбейген.

 «  «Жанұя» орталығында негізінен көп балалы және аз қамтылған отбасыларға көмек ретінде жасалып  жатқан  жұмыс көп. Қала бойынша  қазіргі таңда  тұрмыстық қиын жағдайға тап болған 5 мыңдай  отбасы анықталып отыр.  Көп балалы отбасының балалары  ағылшын тілін тегін үйренуде.   Орталықта менеджер, бағдарламаны үйлестіруші, есепші, заңгер, психолог, әлеуметтік қызметкер, медбике, балалар дәрігері, тәрбиеші тағы да басқа мамандар бар.  Қалалық жұмыспен қамту орталығына келіп, әртүрлі көмекке құжат өткізуші аналарға да жағдай қарастырылған. Бұл жерде   кішкентайларды қарайтын тәрбиеші болғандықтан жас аналар өз жұмыстарын алаңсыз тындырады. Кеңестік кабинетте тұрғын үй — коммуналдық салаға, салық, кәсіпкерлік, тұрғын үй жинақтау, «Бақытты отбасы» мемлекеттік бағдарламалар, әлеуметтік қорғау, атаулы әлеуметтік көмек турасындағы  сауалдар бойынша арнайы мамандар келушілердің қойған  сауалдарына жауап береді.

Көп балалы жанұялар мемлекет тарапынан берілетін көмектермен қамтылған.   Тіркеуге алынған отбасылар коттеджді қалашықта салынған  тұрғын үйлердің  кілтіне ие болуда.  Жыл басынан бері төрт және одан көп баласы бар отбасылар тиісті  жәрдемақы алады. Ал, АӘК мөлшері,  жан басына шаққандағы орташа кіріс пен отбасының әрбір мүшесіне шаққандағы 70 пайыз арасындағы айырма болады »,-дейді  бөлім басшысының орынбасары А.Омарова.

Тағы бір айта кететін жайт, аз қамтылған отбасылар үшін кепілдендірілген әлеуметтік пакет енгізілген. Оған мектеп жасына дейінгі балаларға – балалар тағамы мен гигиеналық заттар , мектеп жасындағы балалар үшін -мектептердегі ыстық тамақ, мектеп киімдері мен керек-жарақтарын сатып алу, жол жүру шығындарын өтеу  кіреді. Әлеуметтік картаны жүзеге асыру аясында көп балалы аналардың  коғамдық көліктермен тегін жүруі, мектепке дейінгі мекемелердегі ата-аналық төлемдеріне субсидиялар, газға қосу және білім беру гранттарына жеңілдіктер қолға алынды.

 Қиын жағдайға тап болған отбасыға осы жуырда «Қарекет» қоғамдық қоры  тұрғын үй алып беріпті. Мынау әлемді  жайлаған коронавирустық пандемия кезінде қайырымдылық танытып жатқандар да бар екен.

Бөлісу
Share on FacebookTweet about this on TwitterEmail this to someoneShare on VK