Каратэдан балалар мен жасөсіпірімдер арасында Талдықорған қаласының ашық Чемпионаты өтті. Астананың 20 жылдығына орай ұйымдастырылған сайысқа бес аудан және үш қаладан 260 спортшы келіп қатысты.

Шараның өтуіне қалалық спорт бөлімі мен WKF Каратэ федерациясы ұйытқы болып отыр. Мұндағы мақсат – Олимпиадалық спорт түріне енген каратэ спортын насихаттап, жастарды спортпен шұғылдануға және салауатты өмір салтын ұстануға шақыру.

Жарыстың ашылу салтанатында «Нұр Отан» партиясы Алматы облыстық филиалы төрғасының орынбасары Серік Нұрқадыров пен Талдықорған қаласының дене шынықтыру және спорт бөлімінің басшысы Әділет Рымтаев сөз алып, спортшыларға жылы лебіздерін білдірді. Сондай-ақ, спорт және еңбек ардагері, Алматы облысының құрметті ақсақалы Әлімғазы Райымбеков жарыс қатысушыларына ақ тілегін ақтарып, батасын берді.

Атап өтсек, сайыста Алматы, Қапшағай қаласынан бөлек Балқаш, Қарасай, Талғар, Қаратал ауданынан келген спортшылар өзара шеберлік байқасты. Ал, Талдықорған қаласынан 100-ге жуық каратэші өз өнерлерін ортаға салды. Жарыс барысында спортшылар жақсы нәтиже көрсетуге тырысып бақты. Арасында татамиде төселіп қалғандары да баршылық. Жеңімпаздар кубок, диплом және медальдармен марапатталды.

Бөлісу
Share on FacebookTweet about this on TwitterEmail this to someoneShare on VK