Мәдениет – ұлт өмірінің айнасы, ғасырлар бойы үзілмей келе жатқан халықтың рухани келбеті, мейірімі мен парасат-пайымы. Әрине, өнерді құрметтеп, мәдениетті өркендету – баршамыздың ортақ мақсатымыз. Десе де, мұражайлар мен кітапханалардың, театрлар мен концерттік ұйымдардың, халық шығармашылығы және мәдениет үйлерінің, қалалық және ауылдық клубтардың қызметкерлерінің, сондай-ақ ақындар мен жазушылардың рөлі ерекше. Олар қоғамымыздағы руханиятты дамытуға, игілікті, адамгершілікті, қайырымдылық пен өзара түсіністікті өрістетуге жол ашып, үздік мәдени дәстүрлерді сақтауға һәм молайтуға ерекше мән беріп келеді.
Мәдениет қызметкерлерінің кәсіби күнінде осы салада қызмет жасап, тер төгіп жүргендер марапатқа ие болды. «Үздік кітапхана» номинациясында «Талдықорған қаласының орталықтандырылған кітапханалар жүйесі» КММ жеңімпаз атанды. Кітапхана басшысы Күлпан Сейітжанованың айтуынша, бұл халықтың кітап оқу мәдениетін қалыптастыруға сүбелі үлес қосып жатқан кітапханашылардың ортақ еңбегіне берілген баға.
