Қазақстан Республикасының Президенті Қасым-Жомарт Тоқаев арнайы жұмыс сапарымен Алматы облысында болды. Талдықорған қаласындағы Салтанат сарайында Жетісу жұртымен жүздескен мемлекет басшысы аймақтағы әр саланың өкілдері және кәсіпкерлермен  ашық пікір алмасты.

Жиналған қауым алдында сөз алған Президент: — Жер жәннаты Жетісу небір  тарихи тұлғалар өмірге келген қасиетті мекен. Өңірдің  сұлу табиғатын ән мен жырға қоспаған ақын кем де кем.  Қабанбай, Бөгенбай, Наурызбай, Қарасай, Райымбек батыр сынды ел қорғаған ерлер мен жыр алыбы Жамбыл мен Ілиястай ақын туған өлкеге елмен етене араласып, жұрттың пікірін тыңдауға келдім.  Бұл аймақтағы алғашқы қазақ ағартушылық мектептерінің бірі, Ақсу жерінде ашылған – Мамания медресесі. Ол  ұлт руханиятына айрықша үлес қосты. Бұл — қазақ тарихындағы білім ордаларының бастау көзі» — деді.

Осыдан соң облыстық ардагерлер кеңесінің төрағасы Ермек Келемсейіт, аймақтағы іскер әйелдер қауымдастығының төрайымы Римма Салықова, «Мәдина» қолөнер бұйымдары шеберханасының жетекшісі Айман Биғалиева тағыда басқа азаматтар жеке-жеке сөз сөйлеп, мемлекет басшысына аймақтағы атқарылып жатқан ауқымды істерді баян етті.

Ел дамуына ерекше үлес қосып отырған Жетісу жерінде бүгінде еңбек өнімділігі жоғары. Нақты мәліметтерге жүгінсек, жыл басынан бері аймақтағы өнеркәсіп өндірісінің көрсеткіші 103,7 пайызды құрап, 185,6 млрд теңгенің өнімі өндірілген. Оның ішінде тау-кен өндірісі 72,5 пайызға, жеңіл өнеркәсіп 19,1 пайызға жоғарылаған.

Кездесу барысында аймақ басшысының жұмысына оң бағасын берген Қасым-Жомарт Кемелұлы қазір Алматы облысындағы жолдардың 22 пайызы сын көтермейді. Апатты жолдарды қалпына келтіру үшін 2025 жылға дейінгі  нақты жоспар құруды тапсырамын. Сондай-ақ, «Әлеуметтік көмекке зәру жандар мен жәрдемақыға күн көретіндерді нақты анықтау керек. Сонымен бірге жергілікті әкімдіктер азаматтарға жер телімдерін бөлуде ашықтықты қамтамасыз етіп, жер ресурстарының тиімді пайдаланылуын қатаң қадағалау қажет деп атап айтты. Осы орайда өңірдің өркендеуіне өз үлестерін қосып келген бірқатар азаматтар  арнайы мемлекет басшысының алғыс хаттарымен марапатталды.

 

Жиын соңында аймақтағы  кәсіпкерлер палатасына ат басын тіреген Президентке «Атамекен» ҰКП басқарма төрағасы Абылай Мырзахметов облыстық кәсіпкерлер палатасы базасында құрылған «Бизнеске арналған Үкімет» жобасын таныстырды. Жобаның басты мақсаты — «бір терезе» қағидаты бойынша бизнесті қолдау мен дамытудың барлық шараларын бір орталықтан көрсету.  Орталықта  кәсіпкерлерге қажетті кеңестер беріліп, жобаларына сүйемелдеу көрсетіледі. Бастысы онда — бәрі айқын, ашық және қолжетімді. Мемлекеттік органдар, қаржы ұйымдарының өкілдері көптеген қызмет түрлерін ұсынады. Осы арқылы бизнес өкілдері мемлекеттік мекемелердің табалдырығын тоздырмай, қажетті қызметтерді онлайн үлгіде алатын болады», — деді Абылай Мырзахметов.

 

Бөлісу
Share on FacebookTweet about this on TwitterEmail this to someoneShare on VK