Талдықорғанда қалалық дүкендерге «Мейірімділік сөрелерін»  орналастыру акциясы өтті. «Жетісу – адалдық алаңы» жобалық кеңсесінің ұйтқы болуымен қолға алынған бұл шара тұрмыстық сыбайлас жемқорлықтың алдын алып, азаматтарға қолайлы жағдай жасауға бағытталған.

Бүгінде жобалық кеңсе Жетісу жеріндегі азаматтардың бойына әділдік, парасаттылық, адалдық қағидаларын қалыптастыру мақсатында көптеген игі істер атқаруда. Бұл жолғы акция соның бір дәлелі.

Ұйымдастырушылардың айтуынша, облыс көлемінде, адамдардың тұрмыстық деңгейі әртүрлі. Осыған байланысты, жобалық кеңсе Талдықорған қаласындағы ірі сауда орталықтарында «Мейірімділік сөрелерін» орналастыруда. Бұл сөрелерді жеке кәсіпкер өз қаражатына дайындап, қалалық «Скиф-трейд» сауда үйінің әкімшілігі орналастыруға ат салысты. Бұған дейін мұндай «Мейірімділік сөресі» шаһардағы Жансүгіров көшесінің бойындағы «Құс жолы» сауда үйінде ашылған болатын. Енді «Жетісу», «Жастар», «Қаратал» шағын аудандарындағы «Мактуб», «Скиф-трейд» сауда  орындарында қойылды.

«Мейірімділік сөрелері» акциясының басты мақсаты – қайырымдылық. Әр адам дүкендердің кіре берісіне орналасқан сөреге күнделікті қолданыстағы тауарлардан бір зат болса да салса, мұқтаж жандарға айтарлықтай көмек көрсеткен болар еді.  Сондықтан «Жетісу — адалдық алаңы» жобалық кеңсесі барша қала тұрғындарын әр түрлі жағдайдағы азаматтарға немқұрайлы қарамай, «Мейірімділік сөресіне» ел болып қол ұшын созуға шақырады,— дейді мамандар.

Бөлісу
Share on FacebookTweet about this on TwitterEmail this to someoneShare on VK