Қазіргі заманда цифрлық технологиялар білім беру жүйесіне кеңінен еніп, оқыту процесін барынша икемді әрі қолжетімді етіп отыр. Әсіресе, қашықтықтан оқыту кезеңінде цифрлық білім беру құралдарының маңыздылығы айқын көрінді. Мұғалімдер мен оқушылар арасындағы үздіксіз байланыс, оқу процесінің жүйелі ұйымдастырылуы түрлі платформалар мен ресурстардың тиімділігін дәлелдеді.
Бұл үдеріс ерекше білім беруді қажет ететін балалар мен олардың отбасылары үшін тіпті маңызды бола түсті. Цифрлық құралдар мен арнайы әзірленген платформалар арқылы олар білім алу барысында туындайтын кедергілерді жеңілдетіп, жеке дамуға және әлеуметтенуге жол ашады. Әлеуметтік және білім беру бағытындағы заманауи платформалар ерекше балалардың оқуына ғана емес, олардың әлеуметтік ортаға бейімделуіне, қарым-қатынас жасау қабілеттерінің дамуына да оң әсерін тигізуде.
Осы тұрғыдан алғанда, TopIQ платформасы – ерекше балалар үшін цифрлық ортада жаңа мүмкіндіктер ашатын маңызды құрал. Бұл платформа үйден оқитын оқушыларға білім алу процесін жеңілдетуге, оны тиімді ұйымдастыруға және ең бастысы — оқу мотивациясын арттыруға бағытталған.
TopIQ платформасы оқушылардың қызығушылығын арттыру мақсатында геймификация әдістерін қолданады. Мысалы, информатика пәні бойынша тапсырмаларды орындаған сайын оқушылар ұпай жинап, жинаған балдары арқылы алдағы сабақтарға арналған қосымша ресурстарға қол жеткізе алады. Әр сабақ соңында оқушы белсенділігі бағаланып, жетістіктері көрсетіледі. Бұл тәсіл олардың өз-өзіне сенімділігін арттырып, үздіксіз оқуына серпін береді.
Сонымен қатар, TopIQ ерекше балалардың шығармашылық қабілеттерін дамытуға және әлеуметтік дағдыларын қалыптастыруға жағдай жасайды. Платформада арнайы бейімделген интерфейс пен қауіпсіздік шаралары қарастырылған, бұл балалардың цифрлық әлемде сенімді әрі еркін әрекет етуіне мүмкіндік береді. Мұндай ортада олар тек білім алып қана қоймай, өзінің жеке қабілеттерін шыңдай алады.
Қорыта айтқанда, ерекше білім беруді қажет ететін балалар үшін цифрлық ресурстардың маңызы күн сайын артып келеді. TopIQ сияқты инклюзивті платформалар бұл үдерісті қолжетімді, тиімді әрі қауіпсіз етіп ұйымдастыруға көмектеседі. Мұндай цифрлық шешімдер келешекте инклюзивті білім беру жүйесінің ажырамас бөлігіне айналып, барлық балаға тең мүмкіндік беретін қоғам құруға үлес қосады.
Кияхметова Айнур Шынтасовна,
Жетісу облысы, Сарқан ауданы, Алмалы ауылы,
«Алмалы орта мектебі мектепке дейінгі шағын орталығымен» КММ,
информатика пәнінің мұғалімі
