Алматы облысының журналистеріне арналған облыс әкімінің «Самғау» журналистер сыйлығының көлемі ұлғайды. Былтыр бұл мақсатқа 7 млн теңге көлемінде қаржы бөлінсе, биыл 8,4 млн теңге қарастырылып отыр.  Бұл туралы Өңірлік коммуникациялар қызметі алаңында өткен брифингте Алматы облысының Ішкі саясат басқармасының басшысы Рустам Алпысбаев мәлімдеді.

«Елбасының «Рухани жаңғыру: болашаққа бағдар» мақаласы аясында біз былтыр өңір журналистеріне тапсырылатын сыйлықты да жаңғырттық. Алдыңғы жылдары бұл облыс әкімінің журналистерге беретін жаңа жылдық сыйақысы ретінде қабылданатын. Әрі көлемі 50-100 мың теңге еді. Марапатталатындар саны 70-80 адам болған. Былтыр біз бұл сыйлықтың мәртебесін көтеріп, көлемін арттырдық. 7 млн теңгені 7 аталым бойынша бөліп, «Самғауды» Жетісу журналистерінің ең құнды сыйлығына айналдыруға қадам жасадық. Ал, биыл облыс әкімі сыйлығының жүлде қоры Амандық Ғаббасұлының қолдауымен тағы ұлғайды. Енді өңірдің журналситикасын дамытуға ерен үлес қосқан ардагерлерді де марапаттаймыз. Сондай-ақ, былтыр операторлар мен бейне-инжинерлерді бір аталым шеңберінде сайысқа қосқанбыз. Ал, биыл «Үздік монтаж» деген аталымды жеке қосып отырмыз. «Үздік желілік басылым» деген де аталым бар. Бұл ретте қадамын сәтті жасап келе жатқан «taldykorgan-online.kz» порталын ерекше атап өтуге болады. Әрине, мықтыны байқау анықтайды. Барлығымыз да мықты болуға ұмтылуымыз керек» деген Рустам Әлиұлы байқаудың шарттарына тоқталып өтті.

«Облыс әкімінің жүлдесі үшін ұйымдасытырлған байқауға Алматы облысында қызмет ететін БАҚ қызметкерлері, журналистер, блогрелер қатыса алады. Негізгі тақырыптар: «Рухни жаңғыру: болашаққа бағдар», «Цифрлық Қазақстан», «Астанаға 20 жыл». Осы және Елбасының өзге де тапсырмаларын қамтитын аудандық, облыстық, республикалық, халықаралық БАҚ беттерінде биылғы жылдың 1-қаңтарынан 1-қарашасы аралығында шыққан барлық жарияланым, бейнесюжет конкурсқа қатыса алады.  Байқаудың қорытындысы 1-желтоқсан – ҚР Тұңғыш Президенті күні қарсаңында шығарылады. Қазылар алқасы сырттан шақырылады. Егер, қатысушылар мен жұмыстар саны көп боп жатса, жеңімпаздар Тәулесіздік мерекесі қарсаңында марапатталады. Биылғы салтанатты жиын Талдықорғанда салынып жатқан жаңа драма театрда, жаңа форматта өтеді деп жоспарланған. Бұл сыйлықтан кейін өзге өңірдің журналистері Жетісулық әріптестеріне қызыға да, қызғана да қарайтын болады» дейді Рустам Алпысбаев.

Айта кетелік, Алматы облысы әкімінің «САМҒАУ» жүлдесін былтыр біздің әріптесіміз Айдын Нұршанов та иеленген болатын. «100 жаңа есім» аталымында үздік фоторепортаж жасаған әріптесімізге облыс әкімі Амандық Баталов арнайы диплом, 500 мың теңгенің сертификаты мен мүсінше сыйлаған еді.

Алматы облысы әкімінің жүлдесі үшін журналисттер арасындағы «Самғау» байқауы туралы ЕРЕЖЕМЕН мына жерде танысуға болады.

Бөлісу
Share on FacebookTweet about this on TwitterEmail this to someoneShare on VK