Татарстаннан олжалы оралды

469
Дереккөз

Бикен Римова атындағы Талдықорған драма театры Татарстанның Буинск қаласында өткен  “Буа:Диалог кеңістігі” II халықаралық театрлар фестиваліне қатысып, туған жерге олжалы оралды. Осы орайда театр басшысы Ғалия Темербаевамен әңгімелесіп, ұжымды құттықтап қайттық.

100 жылдық тарихы бар театр сахнасында Еуропа және Азия елдерінен жалпы 27 театр қатысып, өнерлерін көрсетті. 15-25 мамыр аралығында өткен фестивальде жерлестеріміз У.Шекспирдің әлемге әйгілі «Ромео-Джульетта» трагедиясын сахналады.

Дереккөз

-Біз 2003 жылы “Король Лир” қойылымымен Анталияға, 2005 жылы “Махамбет” қойылымымен Каирге барған едік. Араға біраз уақыт салып тағы да шет елге жол түсті.  Бір  жыл уақыт бойы қазылар алқасының мүшесі Нияз Игламовпен хабарласып отырдық. Өзге әділқазы алқаларына “Талдықорған театры міндетті түрде келуі керек” деп бізге шақыру жіберді. Таңдаудың дәл бізге түскеніне қуаныштымыз. Барып келуімізге мүмкіндік жасаған облыстық әкімдікке, мәдениет, архивтер және құжаттама басқармасының басшысы Ақан Жылқышыбайұлына алғысымызды білдіреміз. Жолға шығар кезімізде бір топ зиялы қауым өкілдері қуанышымызға ортақтасып, батамен шығарып салды. Уақыттарын бөліп, арнайы келген ол жандарға да рақмет. Негізі осы спектакльмен барамыз деп ойлаған жоқпыз. Алдын ала 5-6 спектакльдің бейненұсқасын  жіберіп, арасынан өздері осы қойылымды таңдады. Енді қатысатын фестивальдерге  өзіміздің қазақтың салт-дәстүрін, тарихын, болмысын  көрсететін туындыны апарсақ деген ойымыз бар.

Дереккөз

Фестиваль барысында қатты қобалжыдық. Себебі, Ресейдің қаймақтары өнерімізді тамашалады. Ресейдің жетекші театр сыншысы, Ұлттық театрлар сыйлығының және  «Золотая маска» фестивалінің  қазылар алқасының мүшесі, Эксперттік кеңес төрағасы, драматург, режиссер Александр Вислов, Ресейдің жетекші театртанушысы, әрі театр сыншысы, өнертану кандидаты Татьяна Джурова, театр сыншысы, фестиваль және лаборатория кураторы, Д.Сиразиев атындағы театр сыйлығының лауреаты, Татарстан Республикасының мәдениет саласы бойынша Қоғамдық кеңес мүшесі Нияз  Игламов,  Ресейдің жетекші театр сыншысы, «Любимовка» фестивалінің арт-директоры Анна Банасюкевич,   театртанушы,  әрі театр сыншысы, «Нур» Уфа Татар театры директорының орынбасары, Башқұртстан Республикасының еңбегі сіңген өнер қайраткері Дина Давлетшина, Ресей және Израиль театр режиссері, актер, педагог, сыншы, қуыршақ театр саласының жетекші маманы, «КукАрт» халықаралық театр фестивалінің вице-президенті Виктор  Шрайман, театртанушы,  әрі театр сыншысы, өнертану кандидаты, З.Исмагилова атындағы Уфа мемлекеттік өнер институтының оқытушысы, «Туганлык» түркітілдес халықтарының халықаралық театр фестивалінің бағдарламалық директоры Айсылу Сагитова, өнертану докторы, профессор Исрафил Исрафилов,  театртанушы, әрі театр сыншысы, Қазан мемлекеттік мәдениет және өнер университетінің оқытушысы Гүлшат Фаттахова  сынды «мүйізі қарағайдай» білікті мамандардың сынынан сүрінбей өттік. Көрермендер мен  қазылар алқасы Джульеттаның сұлулығына сүйсінді. Бұл рөлді алғашында сомдаған Асыл Ақтөреева қазір декреттік демалыста болғандықтан, Әсем Жетпісоваға рөлді жарты айда меңгеріп шығуға тура келді. Өзіне артылған жауапкершілікті барынша сезініп, алып шықты. Сыншылар алқасы труппаның пластикасын жоғары бағалады. Сондай-ақ, Тибальт пен Меркуционың қылыштасатын сахнасы жайында ерекше атап өтті. Татьяна Сергеевна “Дәл осы спектакльмен сіздерді Ресейде өтетін фестивальге шақырамын” деп жылы лебізін білдірді. Мұның өзі біз үшін үлкен жетістік. Сол күні әртістеріміз “бір жағадан бас, бір жеңнен қол” шығара отырып өте жақсы ойнап шықты.  Жол жүрер кезде  біздің ең әуелгі мақсатымыз қандай да бір жүлдеге ие болу емес, жастар өзге өнер ордаларын көріп, өзара тәжірибе алмасу деп айтып едім.

 

Дереккөз

Фестивальдің  соңғы күні Ресейдің атақты театр және кино актері, режиссер, продюсер Сергей Безруков “Маленький принц” ертегісін қойды. Екі сағат бойы бір өзі бірнеше образға еніп, кейіпкерлерді сомдады. Қарап тұрсаңыз жәй ғана ертегі, бірақ өнерінің кереметтілігі соншалық залда отырған көрермендер тапжылмастан тамашалады. Нағыз тума талант деуге болады. Біздің жастарымыз оның шеберлігінен өздеріне керегін көңілдеріне түйіп қайтты деп ойлаймын.

Дереккөз

Бұл жерде ешқандай жүлделі орын болған жоқ. Барлық қатысушы театрлар арасынан бізге “У.Шекспирдің «Ромео-Джульетта» трагедиясын мүлтіксіз орындағаны үшін” арнайы сыйлығын  табыстады. Осылайша Жетісуымызға құр қол келмедік. Жалпы, біз үшін рухани байлыққа, шығармашылық шарықтауға  толы  сапар болды. “Театр – киім ілгіштен басталады” деп жатамыз ғой. Біздің бір таңқалғанымыз ол жақтың актерлар қауымы болсын, көрермен болсын театр ғимаратының есігін ашқан сәттен ішке аяқ киімдерін шешіп кіреді.  “Театр деген қасиетті орын, сырт киіммен, аяқ киіммен кірсек өзімізді өзіміз сыйламағанымыз” дейді. Өте ойын-сауықшыл халық екен. Қазақша да, татарша да ән айтып, би билеп, жылы қарсы алды.

Еркебұлан Айдымбаев (Меркуцио), Дәулет Қанат (Тибальт).  Фестиваль болғандықтан қыз-жігіттердің барлығы да тиісті дәрежеде дайындалып, әркім өзін іштей қамшылады. Біздің сахнамыз жайында “Орыстар жәй ғана бір элементін көрсетеді. Сіздерде шынайы айқас сынды көрінді” деді.  Негізі  дәл осы жағынан қорқақтаған болатынбыз. Себебі, қылышты ұстаудың, жүріп-тұрудың өзіндік әдіс-тәсілдері болады. Біздің бір қуанғанымыз ол жақтағылар Шәмші атамыздың, қазіргі таңда жарыққа шығып жүрген әндерді тыңдайды екен. Бұл біздің әндеріміз ғой деп  бірге қосылып, шырқап қайттық. Шет елге шығу мүлдем бөлек болады екен. Жақсы әсермен, шабыттанып қайттық.

Шалқар Мүкен (Ромео). Мен алғаш рет фестивальге барып тұрмын. Қобалжу болды. Әріптестеріміз “Өзіңе сен. Кез келген жағдайда өзіңе сене білу керек. Себебі, қатты қобалжып тұрсаң міндетті түрде бір шикілік болады” деп қолдап отырды.  Халық та жақсы қабылдады. Қазақ тілі мен татар тілі ұқсас болғандықтан, аудармашының көмегінсіз-ақ тамашалады. “Сын түзелмей, мін түзелмес” демекші, шығармашылық, өнер адамы сынмен түзеледі ғой. Актерлар қауымы біреу сын айтса екен деп отырады. Еленбей қалғаннан гөрі, сын естіген әлдеқайда жақсы. Сыншылармен кездесу аяқталғаннан кейін тағы барып қателіктеріміз болса  қайтадан айтыңыздаршы деп қолқа салдым. Бірақ бізді қатты сынаған жоқ. Соған қарағанда барлығы өз деңгейінде шыққан сияқты. Сондай мықты сыншылардың алдынан өту менің бір арманым еді.

Әсем Жетпісова (Джульетта). Ең алғаш рөлді берген кезде өзіме сай келетінін іштей сездім. Бойыма сіңген рөлдердің бірі болды десем де болады. Актрисаның тәжірибесінде қадамды У.Шекспирден бастау үлкен жауапкершілікті талап етеді және бұл бақыт. Шекспирді әлем танитын драматург болғандықтан оның шығармалары да күрделі. Ресей жері нағыз өнердің, театрдың ордасы. Сол жақтағы сыншылардың сөзін есту біз үшін үлкен мәртебе болды.

Дереккөз

Бізді  TDKO қосымшаcынан оқу ыңғайлырақ! AppStore-дан жүктеу үшін.

Бөлісу
Share on FacebookTweet about this on TwitterEmail this to someoneShare on VK