Сәлемімен қоса сәлемдемесі бар

469

Адамзат өмірімен  біте қайнасқан ақпарат  беру, хабар алмасу, хат тасымалдау қызметінің тамыры тереңде.  Тарихқа көз салсаң, қазақ жерінде , пошта бөлімдері болмаған кезде де жаушы, елшілерге  ұланғайыр дала төсінде бір жерден екінші жерге ақпарат жеткізу  мұраты  жүктелген. Заманымыз ақпараттың сан-саласына көшті дегенімізбен де, газет-журналды қолға алып оқудың  өзіндік сыры да, құны да жоғалған жоқ. Біздің кейіпкеріміз-  Назгүл Шәкәрімқызы оқырмандарға күнделікті  хат-хабар жеткізеді.

«Менің ойымша, хат-хабар мен мерзімді баспасөзді жеткізіп берудің өзі үлкен еңбек.  Республикалық «Егемен Қазақстан», «Казахстанская правда», «Айқын», облыстық  «Жетісу» мен «Огни Алатау», қалалық «Талдықорған» газеттері мен журналдарды  почта арқылы жаздыртқан  оқырмандарға жеткізіп беремін. Оқырмандар -«Баспа үйі»,  Оқушылар сарайы, жастарға қызмет көрсету орталығы, «Атамекен» кәсіпкерлік  палатасы –осы  жаңа шағын аудандағы  мекемелерді қамтимын. Кәсіптің үлкен-кішісі болмайды,  айналадаға адамдарға жылы ықылас пен көңіл –күй сыйлай білудің-өзі қымбат дүние»- дейді Н. Сыздықбаева.

 Мойнына асып алған ауыр сөмкені де қиынсынбай көтеріп жүре беретін  жанның  шыдамдылығына таңқаласың. Ақпаратқа  толы  газет-журналдың қағаз болып көрінгенмен, салмағы ауыр. Кез келген ердің қолынан келмес істі  атқарып жүр. «Бұл қара сөмке жыртылуға айналды. Енді тағы бір таза былғарыдан тігілгенін сатып алармын»-деп  қояды өзі күлімдеп.

Назгүл  көктемнің шуақты мерекесінде алғашқы  жылы лебізін  анасы  Олжаханға арнайды.  Жолдасы мен үш  ұлының ақ тілегін естудің өзі бақыт. Сонда да болса, алыс Ақтөбеде  жүрген сіңілісі  Айгүл Назгүл апайына тосын сый жасап, ең бірінші болып құттықтап, ыстық  сәлемін жеткізетін көрінеді.

Есігімізден кіргеннен қал-жағдайымызды білуге тырысып, сәлемімен қоса сәлемдемелерді таратып,  жан-жағына шуақ шашып жүретін осындай Аруларымызбен мақтанамыз. Сарқылмас күш-қуат тілейміз!

Бөлісу
Share on FacebookTweet about this on TwitterEmail this to someoneShare on VK