Жақсылық күтем жалғаннан Үсен ӨМІРЗАҚОВ.

1015
дереккөз

                                            (циклдер)

Жан емеспін мансап қуып малданған,

Өтер-кетер атағыңа алданған.

Туа біткен бойымдағы қасиет,

Тек жақсылық күтем жалпақ жалғаннан.

 

Тіршілікте  рас,  кейде  қиналам.

Жан емеспін бірақ байлық жинаған.

Тілейтінім – амандығы елімнің,

Мен байлықты сол халқымнан сыйға алам.

 

Дүние тап деп қинай берме сүйіктім.

Дәмін таттым алма кезек күйіктің.

Өрелі өлең, шабыт барда бойымда,

Мен ешкімнен төменде емес, биікпін!..

 

Адам сірә, жасамайды мәңгілік,

Оны ұқпас соқыр кеуде әңгүдік.

Мен өмірде жүрсем болды әйтеуір,

Көз жұмғанша, өз елімде сән құрып.

 ********

Ажал кеп алса жағадан,

Құтылған пенде жоқ одан.

Патша да, құл да түбінде,

Табылады моладан.

 

Жер бесікке бөленер,

Сен оған кәміл сене бер.

Жаннаттан орын аларсың,

Күнәсіз болсаң  сен егер.

 

Тіршілік соқпас оңайға,

Қиянат қылма алайда.

Жасаған әрбір ісіңнің,

Сұрауы болар қалай да.

 

Дүниеге мына келген соң,

Қызығын бастап көрген соң.

Өсиет болар жақсы сөз,

Артыңда қалсын өлген соң.

 

Ұрпағың өмір жалғасың.

Шырқарын өзі талдасын.

Ойға алған істі орында,

Арман боп іште қалмасын.

 

Самұрық қиял самғасын.

Қанаты бірден талмасын.

Оңды-солды сілтейтін,

Текті сөз семсер, алмасың.

********

Қарсы алдыма қоям да,

Суретіңе телмірем.

Сүйгеніме ой, Алла,

Қалай сені сендірем.

 

Тәуіп іздеп дуға-ырым,

Қойсам ба екен жасатып.

Жүрегіңнен бір орын,

Берсін маған босатып.

 

Қарай көр деп дәмесін,

Бәлкім теріс көрерсің.

Әсер етсе сол дұға,

Ақыр түбі көнерсің.

 

Саған жақын баталмай,

Есім мүлде ауған, ә?..

Қой, күнаһар аталмай,

Келейінші, тәубема!..

Бізді TDKO қосымшаcынан оқу ыңғайлырақ! App Store-дан жүктеу үшін.

Бөлісу
Share on FacebookTweet about this on TwitterEmail this to someoneShare on VK