Біздің елімізде болып жатқан барлық өзгерістерді әрбір азаматтың өміріне тікелей әсер ететін маңызды үдерістер ретінде қабылдаймын. Өйткені мемлекеттің дамуы, қоғамның тұрақтылығы мен халықтың әл-ауқаты – баршамызға ортақ құндылықтар. Менің ойымша, елдің Негізгі Заңы – Конституция мемлекет пен қоғам өмірінде айрықша орын алатын маңызды құжат. Ол азаматтардың құқықтары мен бостандықтарын, міндеттерін айқындап қана қоймай, елдегі заңдылықтың, тәртіптің, тұрақтылық пен әділеттіліктің берік негізін қалайды.
Конституцияның басты құндылығы – адам, оның өмірі, құқықтары мен бостандықтары. Мемлекеттік саясаттың негізінде адамға деген құрмет, азаматтардың заңды мүдделерін қорғау, халықтың бірлігі мен қоғамдық келісімді нығайту сияқты қағидаттардың болуы ерекше маңызды. Себебі мемлекет дамуының негізгі көрсеткіші тек экономикалық жетістіктермен ғана емес, ең алдымен, адамдардың өмір сүру сапасымен, өз болашағына деген сенімімен және қоғамдағы әділдік пен тең мүмкіндіктердің қамтамасыз етілуімен өлшенеді. Бүгінде Қазақстан түрлі бағытта даму жолын жалғастырып келеді. Әлеуметтік бағдарламалар жүзеге асырылып, білім беру мен денсаулық сақтау салалары жетілдірілуде, инфрақұрылым жаңарып, қалалар мен ауылдардың дамуына көңіл бөлінуде. Халықтың тұрмысын жақсарту, азаматтарға қолайлы жағдай жасау, жастарға сапалы білім алып, еңбек етуге мүмкіндік беру – ел болашағы үшін маңызды міндеттер. Осындай бастамалардың нәтижесінде әрбір азаматтың қоғам өміріне белсенді араласуына, өз қабілетін жүзеге асыруына және ел дамуына үлес қосуына жол ашылады. Аға буын өкілі ретінде мен мемлекеттің әрбір өзгерісі мен жаңғыруы, ең алдымен, халықтың игілігіне қызмет етуі керек деп есептеймін. Кез келген реформа елдің тұрақтылығын нығайтуға, азаматтардың әл-ауқатын арттыруға, заң үстемдігін қамтамасыз етуге және келешек ұрпақтың өміріне оң ықпал етуге бағытталуы тиіс. Өйткені елдің дамуы – бір күндік нәтиже емес, ол ұрпақтар сабақтастығына, ортақ жауапкершілікке және қоғамның бірлескен еңбегіне негізделетін ұзақ мерзімді үдеріс. Конституциялық өзгерістер мен жаңа құқықтық нормаларды қабылдауда да осы мақсаттар басты назарда болды. Жаңа Конституция елдің қоғамдық-саяси және мемлекеттік жүйесін одан әрі жетілдіруге, басқару тетіктерін дамытуға, азаматтардың құқықтық қорғалуын күшейтуге және қоғамның мемлекетке деген сенімін арттыруға мүмкіндік беретін маңызды қадам бола алды. Менің түсінігімде, әділетті қоғам құру – тек мемлекеттің ғана емес, әрбір азаматтың ортақ міндеті. Заңды құрметтеу, өз міндеттерін адал орындау, қоғамдық тәртіпті сақтау, өзгенің құқығы мен пікіріне құрметпен қарау – өркениетті қоғамның негізгі белгілері. Сонымен қатар, жастарға өнегелі тәрбие беру, үлкенді сыйлау, кішіге қамқор болу, ұлттық құндылықтарымызды сақтау және туған жерге деген сүйіспеншілікті арттыру да ел бірлігін нығайтатын маңызды факторлар болып табылады. Конституцияны құрметтеу – елді, халықты және болашақ ұрпақты құрметтеу деп білемін. Біз аға буын ретінде кейінгі ұрпаққа бірлік пен ынтымақтың, адалдық пен жауапкершіліктің үлгісін көрсетуіміз керек.
Ләззат Кәмелқызы
