Жетісу облысында ауыл шаруашылығы өнімдерінің шикізатын өңдеу үлесі 2023 жылмен салыстырғанда 49%-дан 68%-ға өсті. Жоспарымыз 80%-ға жету. Бұл туралы облыс әкімі Бейбіт Исабаев ҚР Президенті жанындағы Орталық коммуникациялар қызметі алаңында өткен брифинг барысында айтты, — деп хабарлайды Жетісу облысы әкімінің баспасөз қызметі.
Мәселен, Ақсу қант зауыты толық модернизациядан өтіп, қайта іске қосылды. Майлы дақылдарды қайта өңдейтін «Жетісу Мажико Агрокешені» (100 мың тн), Көксу қант (тәулігіне 1,7 мың тоннадан 2,2 мың тоннаға), Жаркент крахмал-сірне (жылына 150 мың тоннадан 220 мың тоннаға) зауыттарының қуаттары ұлғайтылды. Сонымен қатар, облыста жыл сайын 100 мың тоннадан астам сүт, 1,5 мың тоннаға дейін балық өңделеді.
— Қант қызылшасының егіс алаңы 3 есе артып, 2022 жылы 4,2 мың гектардан 2025 жылы 12,2 мың гектарға жетті. Биыл 490 мың тонна тәтті түбір жиналып, 87 мың тонна қант өндіру жоспарлануда, оның 60 мың тоннасы қызылшадан, 27 мың тоннасы қамыстан өңделеді. Сөйтіп ауыл шаруашылығы өнімдерін қайта өңдеу үлесін ұлғайтып, ішкі нарықты қамтумен қатар экспортқа бағыттауға басымдық беріледі, — деді Бейбіт Исабаев.
Жетісу облысы әкімінің баспасөз қызметі.
Фотографтар: Жеңіс Ысқабай, Дмитрий Ерофеев, Жұмабай Мұсабеков
