Алматы облысында Қазақстан мұсылмандары діни басқармасы ұйымдастырған «Зекет» қорының «Ел үлесі — пәтерге» жобасы аясында көптеген игі істер атқарылуда. Жақында қор жетекшілері 91-ші үйдің кілтін Талдықорған өңірі, Қаратал ауданы, Үштөбе қаласының тұрғыны Асхат Оспановқа табыс етті.

Жастайынан жетім өскен Асхаттың екі баласы бар. Көзге көрінерлік табысы болмағандықтан жұбайы екеуі  көп жылдардан бері бір баспанаға зәру болып, қолы жетпей келген. Баспананы аймақтағы бір шаруа қожалығының иесі, белгілі кәсіпкер Серік Сүлейменов деген азамат өзінің мұсылмандық парызының бірі зекет ретінде сатып алып берген. Қор жауаптыларының айтуынша, шараға  жалпы жетісулық қайырымды жандар, кәсіпкерлер қол ұшын созуда. Бұл бастама негізі  тұрмысында қиыншылығы бар жетім-жесір, мүгедек және көпбалалы отбасы мүшелеріне көмектесуге бағытталған. Мұндай сауапты іске ат салысқан әрбір жанға Алланың нұры жаусын! Бұл жұмыстар бұдан былай да жалғасын табады. Егер мұқтаж жандарға көмек қолын созам деушілер болса аймақтағы әр бір мешітте арнайы жәшіктер қойылған.

Бөлісу
Share on FacebookTweet about this on TwitterEmail this to someoneShare on VK