Сағыныш ақынның «Қауырсын-ғұмыры»

358
Сағыныш Намазшамованың шығармашылық кеші

Ол – поэзия әлемінің падишасы атанған Фаризаның ізін жалғаушы. Ол — көпшілікке жауhар жырларымен етене таныс. Ол — жүрек пернесін  шерте білген ақын. Оның болмысы  нәзік, өлеңі сырлы сезімге толы.   Өзіне тән сабырлығымен өзгелерден ерек. Әдебиет айдынында жүзген жерлесіміз Сағыныш Намазшамованың «Қауырсын-ғұмыр» атты шығармашылық кеші өтті.

Сағыныш Намазшамованың шығармашылық кеші

Орыс әдебиеттанушысы В.Белинский: «Поэзия — тұтас өнер, онда үн де, сурет те айқын айтылған. Пайымды түсінік те бар. Ол — бар өнердің ерекшелігін бойына жиып, барлығының ұйытқысы болады»- деген екен. Тап-таза ақ параққа сұлу сөз өру оңай емес. Бірде баладай шаттанып, бірде данадай өрелі ой айтып, енді бірде өмірдің сан мыңдаған бұралаң жолдарынан өтіп, түрлі кейіпке ене отырып өлеңге өмір сыйлайды. «Өлең — ақынның сөзі ғана емес, өмірдің өзі. Қуанышым мен шаттығымды, сырым мен мұңымды өзгеге емес, ең алдымен өлеңге айтам. Сондықтан,  кеште оқылатын өлеңдерімнен жанымның дірілін, жанарымның жарқылын, жүрегімнің лүпілін тыңдасаңыздар, соның әрқайсысында мен бар деп білгейсіздер»-деді Сағыныш ақын.  Кештің алғашқы бөліміне  өскен ортасы, туған жері арқау болса,  кейін жастық шақ, отбасы, іңкар сезім туралы өлеңдерімен жалғасты. Мерейтойлық кешке әдеби ортадағы қаламдастары, кіндік қаны тамған Ақсу өңіріндегі театр ұжымы және  Әл-Фараби атындағы ҚазҰУ Журналистика факультетінің білімгерлері арнайы келіп, өнер көрсетті.

Сағыныш Намазшамованың шығармашылық кеші

Сонымен қатар ақынның сөзіне жазылған «Бабамның бағзы мекені» әнін Әбілтай Есенгелдиев, Гүлнұр Нұрасылова «Ауылым», Нұржан Батпақбаев «Сезім вальсі» әндерін орындады. Ақынның кішкентай қызғалдағы Арайлым «Анажаным» әнін шырқады. Жиналған қауым бір сәт ана мен бала арасындағы кіршіксіз hәм шексіз  махаббатқа куә болып, «ұрпақтар сабақтастығының жалғасы» десті. Жиын соңында ақын Ерлан Жүніс ҚР Жазушылар одағы басқармасының  төрағасы Ұлықбек Есдәулеттің ықыласты сәлемін жеткізді. Сондай-ақ,  ақын, аудармашы, «Серпер» сыйлығының лауреаты, дүниежүзілік Әдебиет және өнер академиясының вице-президенті, «Мөлдір бұлақ» журналының бас редакторы Саят Қамшыгер, Ақсу аудандық мәдениет және тілдерді дамыту бөлімінің басшысы Айна Елубаева жүрек жарды лебіздерін білдіріп, құттықтады.

Төлеген Айбергенов: «Поэзия — адам көкірегінің ең алыс түкпірлеріне дейін шымырлап-жаңғырып, шулап, буырқанып жететін ең сұлу жан сыры, тұтас бір халықтың басынан кешірген рухани өмірінің көркем тарихы. Адамның сол ішкі жан-дүниесінің шынайы адал сыры жайлы бүкпесіз ақтарыла сөйлегендіктен де нағыз поэзияның ғұмыры шексіз»,-деген екен. Поэзия атты алып мұхиттың мөлдір тамшысы жетісулық ақынға жырлары мәңгілік болғай дейміз. Ақын Гүлбақыт Қасенше тұжырымдар  болсақ:

«Сағыныш, сағыныш жыр – сағыныш мұң,
Әнісің таусылмайтын сағыныштың.
Өнердің маржан теріп теңізінен,
Өлеңнің тұнық, кәусар балын іштің.
Сағыныш, Сағыныш қыз, сағыныш ән,
Жүрегі бар жандарға сағыныш – тән.
Әр сәтің тұрсын дәйім –
Аялаудан,
Аңсаудан,
Армандаудан,
Сағыныштан!

Сағыныш… Сағыныш қыз… Сағынышжан…»

Бөлісу
Share on FacebookTweet about this on TwitterEmail this to someoneShare on VK