Талдықорғанда 31 мамыр күні ашаршылық пен қуғын-сүргін құрбандарын еске алуға арналған тағылымды шара өтті. Басқосуды С.Сейфуллин атындағы Алматы облыстық әмбебап кітапханасының зағип және нашар көретін жандарға арналған арнайы бөлімі ұйымдастырды.

Шара аштықтан және ел мүддесін қорғау жолында еш жазықсыз көз жұмған ұлт жанашырларын бір минут үнсіз еске алумен басталды. Жиналған қауым алдында сөз алған кітапхана басшысы Ғалия Сламбайқызы осы бір азалы күннің мәні мен маңызына кеңінен тоқталып, қолдан жасалған нәубет жұрт жүрегінде мәңгі сақталатынын атап айтты. Сондай-ақ, ол: «31 мамырды «қаралы күн» деп қана атап өтіп қоймай, азат, Тәуелсіз мемлекеттің әр перзенті бұл нәубетті толық түсініп, сабақ алуы тиіс. Ел тарихында бұл қасірет халық жадынан  ешқашан өшпейді. Бүгін арыстарымызды еске алып, азалы тарихқа тағзым ететін күн », — деді.

Осыдан соң «Серпер» сыйлығының иегері Төлеутай Серіков  сазгер Мұратхан Егінбаевтың «Үш арыс» әнін әуелете шырқап  жиылған қауымды әсерлендіре түссе, кітапхананың тұрақты оқырманы Айгерім Көпбаева «Қазақ елі» әнін орындап көрермендерге рухты жігер сыйлады.

Кітапхананың бөлім меңгерушісі Айнаш Райқұлқызының айтуынша, орталық кітапханада көру қуаты әлсіз жандардың кітап оқуына бар мүмкіндік қарастырылған. Бүгінде онда 30-ға жуық зағип оқырман бар. Олар сол мүмкіндіктерді пайдаланып, өздеріне қажетті кітаптарды оқып, жан-жақты сабақ ала алады.

Шара соңында түрлі шараларға және «Жанарым жүрегімде» жобасына атсалысып жүрген белсенді оқырмандар марапатталып, оларға арнайы Алғыс хаттар мен сыйлықтар табысталды.

Бөлісу
Share on FacebookTweet about this on TwitterEmail this to someoneShare on VK