Талдықорған қаласындағы «Аутизм және басқа да менталды бұзылыстары бар балаларға арналған күндізгі болу орталығы» КММ «Қамқорлық қоры» корпоративтік қоры ұйымдастырған «Үздік «Қамқорлық» орталығы – 2025» республикалық байқауының жеңімпазы атанды.
Бұл орталық 2023 жылдың 31 мамырында инклюзивті қоғамды дамытуға бағытталған «Қамқорлық қоры» корпоративтік қорының бастамасымен ашылған болатын. Орталықтың басты мақсаты — әр баланың әлеуетін ашуға көмектесу, оларды қарым-қатынасқа баулу және өмірге сенімді қадам басуына жағдай жасау.
Орталық ашылғалы бері 291 балаға арнаулы әлеуметтік қызмет көрсетілді. Мамандардың кәсіби шеберлігінің арқасында 23 бала мектеп табалдырығын аттап, тағы 5 бала балабақша ортасына сәтті бейімделді.
Мамандардың өз ісіне деген сүйіспеншілігі мен кәсіби біліктілігінің арқасында орталыққа келуші балалардың басым бөлігінде сөйлеу дағдысы, қарым-қатынас, мінез-құлықты қалыптастыру және моториканы дамытудың тұрақты оң динамикасы байқалады. Әрбір кішкентай жеңістің артында мамандардың қажырлы еңбегі, ата-аналардың сенімі мен балалардың қайсарлығы тұр.
Орталықта дефектолог, психолог, логопед, педагогтар мен медицина қызметкерлері ата-аналармен тығыз байланыста жұмыла жұмыс істейді.
Орталық тәрбиеленушілері шығармашылық және дамытушылық іс-шараларға белсене қатысып тұрады. Олардың қолөнер туындылары орталық көрмелерін безендіріп, балалардың өзіне деген сенімін нығайта түсуде.
Жетісу облысының жұмыспен қамтуды үйлестіру және әлеуметтік бағдарламалар басқармасы
