COVID-19 індетіне байланысты елімізде қатаң карантин жарияланып, нәтиже оңала бастағандай.  Күні кеше ғана Президент Қасым-Жомарт Тоқаев аталмыш шараны тағы екі аптаға созуды тапсырды. Бәрі де халық қамы.

Алматы облысының әкімі Амандық Баталовтың  басшылығымен облыстағы жағдай да тұрақтанды. Облыстық денсаулық сақтау басқармасынан алынған мәліметтерге жүгінсек, тұрғындар тарапынан жедел-жәрдем шақыру қызметін пайдаланушылар қатары 25 пайызға азайған. Облыс бойынша 4104 адам індет жұқтырса, 3233 науқас  ауруынан айығып, отбасына оралған. 4420 адам дәрігерлер бақылауында. Оның ішінде  2298 адам стационарлық ем қабылдап жатса, 1546 үй жағдайында емделуде.  Індеттің таралу қарқыны бәсеңдегенін клиникалардағы төсек-орын жүктемесінің 100-ден 67 пайызға азайғанынан байқауға болады. Барлық емханаларды өкпені жасанды желдету аппараттары және оттегі концентраторымен қамту ісі жалғасуда.

Басқарма басшысы Бауыржан Ысқақтың айтуынша, инфекциялық және провизорлық стационарларда  дәрі-дәрмек қоры жеткілікті. Республикалық резервтен  дәрінің қорын толықтыру үшін 551,3 млн. теңге бөлінсе, оның  20 млн. теңге сомасына вирусқа қарсы препараттардың 39 атауына және 531,3 млн. теңге қаржыға жеке қорғану құралдарына өтінім жіберіліп, «Demeu Trading» ЖШС-мен 263,2 млн.теңгеге бір реттік қорғаныш костюмдерінің 35 100 жиынтығын жеткізуге шарт жасалған екен.

Бүгінгі күні 2,1 млн. маска жеткізілген. Облыста жеке қорғану құралдарының қоры бір айға жеткілікті оның ішінде 850 мың маска, 150 мың жұп қолғап және 45 мың жиынтық қорғаныш бір реттік костюмдер бар.

Өңірдің инфекциялық және провизорлық стационарларында 250 930 қызу түсіретін, 40 535 вирусқа қарсы препараттар, сондай-ақ 475 380 антибиотиктер бар. Қазіргі уақытта Талдықорған қаласының қоймаларында 124 637 мың препарат қолжетімді.

Ковидқа тест тапсыру 4 зертханада: «Ұлттық сараптама орталығының» вирусология  зертханасында, НЦЭ аса жұқпалы аурулар зертханасында, Талдықорған қаласындағы обаға қарсы күрес станциясы мен Еңбекшіқазақ аудандық  ауруханасындағы зертханада  жүргізілуде.

COVID-19 жұқтырған қазақстандықтарға тегін дәрілер қашан және қайда беріледі деген сауалға келсек,  Денсаулық сақтау министрлігі коронавирус инфекциясын жұқтырып алған қазақстандықтарға тегін түрде берілетін дәрі-дәрмектерді анықтап, коронавирус инфекциясының емі мен диагностикасы үшін дәрі-дәрмектің бес түрі енгізілгенін хабарлауда. Бұл препараттар амбулаторлық науқастарға арналған. Олардың қатарында «Парацетамол», «Ибупрофен», «Дабигатран», «Апиксабан» мен «Ривароксабан» бар.

Аталмыш дәрі-дәрмектер COVID-19 инфекциясының өту қарқынын жеңілдетіп, оның ушығып кетпеуіне көмектеседі. Қазіргі таңда денсаулық сақтау министрлігі «СК-Фармация» компаниясымен біріге отырып, дәрілерді сатып алуда. Қос мекеме алдағы уақытта тез арада препараттарды мемлекет өңірлеріне жібермек. Облыстарға аталмыш дәрі-дәрмектер он күннен кейін жеткізіле бастайды,- дейді денсаулық сақтау вице-министрі Людмила Бюрабекова.

Коронавирус жұқтырып алған қазақстандықтар дәрілерді емдеуші дәрігердің ұсынатын дәріқағазы бойынша емханадан ала алады. Егер медицина қызметкерлері түрлі себептермен аталмыш препараттарды беруден бас тартып жатса, қазақстандықтар бірыңғай дистрибьютордың жедел желісіне — 1439 хабарласып, шағым түсіруіне болады.

Гүлжанат Нұршанова.

 

Бөлісу
Share on FacebookTweet about this on TwitterEmail this to someoneShare on VK