Достық үйінде «Рухани жаңғыру – тәуелсіз Қазақстанның тарихи ұстанымы» атты облыстық форум өтті.
Алматы облыстық Қазақстан халқы Ассамблеясы төрағасының орынбасары, хатшылық меңгерушісі Ғабит Тұрсынбай «Болашаққа бағдар: рухани жаңғыру» бағдарламасы аясында, еліміздің дамуы мен бірлігінің арта түсуі үшін өңірде бірнеше бағытта жұмыс жүргізілуде екенін атап өтті. «Келер жылы Қазақстан халқы Ассамблеясының құрылғанына 25 жыл толғалы отыр. Осыншама уақыттың ішінде біздің Ассамблея, этно-мәдени орталықтар үлестерін қосып, ел бірлігін нығайтуға қызмет етіп келеді. Әлеуметтік және этникалық топтар арасындағы келісім — бұл бүкіл қоғамның бірлескен еңбегінің нәтижесі. Алматы облысында 105 этнос өкілдері топтасып, тату өмір сүріп жатыр. Олардың тіл мен мәдениетін дамытуға облыстық Ассамблея, Достық үйі қоғамдық келісім орталығы мен 71 этно-мәдени бірлестіктер қызмет етуде. Еліміздің басты жетістіктері бейбітшілік пен келісімді нығайтып, этносаралық қарым-қатынастың берік болуына облыстық барлық мемлекеттік құрылымдар мен аудан, қала әкімдіктері де баса көңіл бөліп отыр. Қазақстан халқының дәстүрлері сақталып, этносаралық келісім мен татулықтың нығая түсуіне Қазақстан халқы Ассамблеясы ұдайы үздіксіз қызмет етіп келеді».
Аталмыш жиын барысында Алматы облысындағы ұйғыр халқының мәдени күндері аталып өтті. 12 ауданның өкілдері жиналған қауымға ұлттық тағамдар мен аспаптар, қолөнер бұйымдарының көрмесін ұсынды. Сондай-ақ, өнерді насихаттап, мәдени шараларға белсене атсалысып жүрген «Шатлық» ұйғыр халықтық ансамблінің құрылғанына 50 жыл толуына орай ұжым мүшелері Алғыс хатпен марапатталды.
