Наурыз мерекесі — тағылымдық мәні зор жалпыхалықтық мейрам. Рухани байлығымыз бен ұлттық колоритіміздің айқын көрінісі. Міржақып Дулатұлы «Мұсылман жұрттарына ортақ, жылына екі рет келетін Ораза, Құрбан айттарын есепке алмағанда, бізде жалғыз мейрам бар, ол – Наурыз. Қыс бойы ақ кебінін жамылып, өлім төсегінде жатқан табиғаттың, жанды-жансыздың тірілуі кімнің болса да, көңіліне шаттық беретіні анық болса, тіршілік жағынан қыстың өтуіне, жаздың жетуіне қазақтан артық тілектес, қазақтан артық қуанатын ел жоқ деуге саяды»-деп мейрам мәртебесін айшықтайды.
Мемлекет басшысы Қасым-Жомарт Тоқаев «Әз-Наурыз – жаңашылдық пен жасампаз рухтың жаршысы. Осы күндері Жер-ана қайта түлеп, тіршілік атаулы түгел жанданады. Тағылымы мол бұл мереке – жаңару мен жаңғырудың, адам мен табиғат арасындағы үндестіктің, келісім мен татулықтың алтын арқауы. Халқымыз қашанда жыл басын ізгі ниетпен, үкілі үмітпен, ақ жарма тілекпен қарсы алады»-деген болатын. Жыл басы Талдықорғанда айрықша сән-салтанатпен аталып өтілді. Осы күні Талдықорғандағы «Жастар» саябағы маңында киіз үй тігіліп, салт-дәстүр көрсетілді, спорттық жарыстар, палуандар арасында қазақ күресінен «Талдықорған барысы» жарысы сияқты көптеген іс-шаралар ұйымдастырылды. Қазақ халқының және облыста тұратын өзге де ұлт пен ұлыстардың этно-мәдени көрмесі, «Шеберлер ауылында» қала кәсіпорындарының қатысуымен «Қазақстанда жасалған» көрме-жәрмеңкесі ұйымдастырылды. Сахнадағы мереке облыс әкімі Бейбіт Исабаевтың құттықтауымен басталды. Облыс әкімі өз сөзінде соңғы жылдары Наурызды халықты біріктіретін, қоғамды ұйыстыратын ортақ құндылық ретінде орнықтыруға баса назар аударылып отырғанын атап өтті. Елімізде Наурызды тойлау он күнге созылғанын, сөйтіп мейрамның ауқымы кеңейіп, мәні тереңдей түскенін тілге тиек етті. -Наурыз мерекесі – бізге мыңжылдықтардан мирас болған халқымыздың айрықша мұраларының бірі. Наурызды мерекелеу аясында облысымыздың түкпір-түкпірінде 230-дан астам сан түрлі іс-шара өткізілуде. Наурыз күндері 5 мыңға жуық ағаш отырғыздық. Көмекке мұқтаж жандарға қайырымдылық акциялары ұйымдастырылды. Мұндай шаралар жыл бойы үздіксіз жалғасып келеді. Бұл – біздің Жетісу халқының ынтымағының айқын көрінісі, — деді Б.Исабаев. Айта кетейік, мерекелік шараларда биыл мерейтойы аталып өтілетін тарихи тұлғалардың еңбегі кеңінен дәріптелді. «Бақтыбай Жолбарысұлы ауылы», «Шоқан Уәлиханов ауылы», 180 жылдығына орай «Абай Құнанбайұлы ауылы», 120 жылдығына орай «Қанабек Байсейітов ауылы», 95 жылдығына орай «Әнуар Әлімжанов ауылы», 80 жылдықтарына орай «Жұматай Жақыпбаев ауылы» және «Құман Тастанбеков ауылы» тігіліп, онда көрнекті тұлғалардың өмірі мен елге сіңірген еңбегіне арналған көрмелер ұйымдастырылып, театрландырылған көріністер қойылды. Сонымен қатар Қазақстан халқы Ассамблеясының 30 жылдығына орай «Достық ауылы» киіз үйінде ұлт пен ұлыстар достығы көрсетілді.
