Бүгін Талдықорған қаласында Ауған жерінен Кеңес әскерінің шығарылғанына 30 жыл толуына орай «МАРАФОН – 2019» жарысы жалауын желбіретті. Салауатты өмір салтын насихаттау мақсатында өткен шараға 1000-нан астам адам қатысты, — деп хабарлайды taldykorgan-online.kz

Жарыстың ашылу рәсімінде Алматы олыстық Қазақстан халқы Ассамблеясы төрағасының орынбасары, хатшылық меңгерушісі Ғабит Тұрсынбай сөз алып, қала тұрғындары мен қонақтарын спорт меркесімен құттықтады.

– Өздеріңіз білесіздер осыдан 30 жыл бұрын Кеңес әскерлері Ауған жерінен шығарылған болатын. Биыл бұл атаулы дата жастар жылымен тұспа-тұс келіп отыр. Он жылға созылған соғысқа Алматы облысынан 22 мыңға жуық адам аттанған еді. Солардың мыңға жуығы ұрыс даласында қаза тапса, 24 сарбасз хабарсыз кеткен. Ауған жеріне барған жерлестеріміз Кеңестер одағы алдындағы интернационалисттік борыштарын адал өтеп, ерен ерліктің өшпес үлгісін көрсетті. Ардагерлеріміз қазіргі таңда да әр сала бойынша қызмет атқарып, еліміздің дамуына өз үлестерін қосып, жастарымызға үлгі өнеге көрсетіп келеді. Әрқашанда еліміз аман, жұртымыз тыныш, жастарымыз жігерлі болсын, — деген облыстық Қазақстан халқы Ассамблеясы төрағасының орынбасары жарыс қатысушыларына сәттілік тіледі.

Сондай-ақ, облыстық Ауған соғысы ардагерлері ұйымының төрағасы Қайрат Темірғалиұлы, Жастар саясаты мәселелері басқармасының басшысы Жомар Қаратас, облыстық спорт басқармасының басшысы Нұрбақыт Теңізбаев және ардагерлер арасында жеңіл атлетикадан Әлем чемпионы Биебай Тлемисовтар да өздерінің жылы лебіздерін білдірді.

Сонымен көпшілік күткен жарыс та басталды. Марафоншылар орталық алаңнан бастап, Жастарға қызмет көрсету орталығына дейін жүгірді. Жалпы, қатысушылар төр жас ерекшелігі бойынша кім жүйрікті анықтады. Сайыс қорытындысы бойынша 14-17 жас аралығында Ернар Жұмамұратұлы, 18-25 жас аралығында Данияр Орманғали, 26-35 жас аралығында Александр Ськоев және 40-тан жоғары жастағы қатысушылар арасынан Биебай Тлемисов мәре сызығын бірінші кесіп, жарыс жеңімпазы атанды.

Ардагерлер арасында жеңіл атлетикадан Әлем чемпионы Биебай Тлемисов:

— Бүгінгі марафон өте жоғары деңгейде ұйымдастырылған. Жарыстың басы-қасында жүрген азаматтарға көп рахмет! Негізі, мұндай шараларды көбірек ұйымдастырып тұрған дұрыс. Мәселен, менің жасым 70-ке тақап қалса да, әлі күнге дейін спорттан алыстаған емеспін, жүгіріп жүргеніме 50 жылдай болды. Мұның барлығы жастарымызға үлгі ғой.

Айта кетейік, жарысты Алматы облысы жастар саясаты мәселелері басқармасы Талдықорған қаласының әкімдігімен, облыстық дене шынықтыру және спорт басқармасымен, облыстық Мемлекеттік қызмет істері және сыбайлас жемқорлыққа қарсы іс-қимыл агенттігінің Департаментімен, облыстық Қазақстан халқы Ассамблеясымен және Ауған соғысы ардагерлерінің ұйымымен бірлесіп ұйымдастырған.

Бөлісу
Share on FacebookTweet about this on TwitterEmail this to someoneShare on VK