Талдықорған қаласының тұрғыны көпқабатты үйдің ауласын гүлденген баққа айналдырды. Ол үйдің кіреберіс тұсына жыл сайын сан түрлі гүл өсіреді. Бұл гүлдер қара суық түскенше өңін бермейді. Зейнеткердің еңбекқорлығының арқасында «Самал» шағын ауданындағы №11 үйде өсімдіктердің 60-тан астам түрі өсіп тұрған бұл ауланың «Үлгілі» атағына ие болуы да ғажап емес.
Ольга Серебренникова әр гүлге жан жылуын, көңіл шуағын қоса құяды. Он бір жыл ішінде әуесқой бағбан жүздеген түрлі гүл өсіріп келеді. Оның өз туған жері мен өз қаласына деген сүйіспеншілігі көпке үлгі болып отыр. Мұндай игі іс бос жатқан жер учаскесін тиімді пайдалансақ деген ниеттен басталған еді.
«Медицина саласында жұмыс істедім, зейнеткерлікке шыққаннан кейін бос уақытым көбейді, сосын гүл өсірумен айналыса бастадым. Менде әртүрлі гүл өсіремін. Шырайгүл, түймедақ, балшатыр, бақытгүл, астра, барқытгүл, қоңыраугүл және басқа да көптеген түрлері бар. Ал бөртегүл көктемде гүлдейді. Жалпы гүлдің 60-тан астам түрі бар. Әсіресе тас раушан – өте ерекше гүл. Өз қолыммен гүлзар жасадым. Басқа да гүл өсірушілермен араласып тұрамын. Біз бір-бірімізбен тәжірибе алмасамыз, бір-бірімізге көшет, тұқым береміз. Біздің өз қолымызбен оазис жасап отырмыз, соны күтеміз, суарамыз. Әрі әдемі, әрі пайдалы. Көршілерге ұнайды, олар бізге қолдау көрсетеді, бірге қуанады, балалар да гүлге ұқыпты қарайды», — деді Ольга Николаевна, қала тұрғындарын өз аулаларын безендіріп, көгалдандыруға шақырып.
Облыс орталығының тағы бір тұрғыны өз ауласын көгалдандырумен 15 жылдан бері айналысып келеді. Ол 50 сотық жерге үлкен гүлзар жасап, жеміс ағаштарын өсіріп отыр. Ләззат Асанова көшесіндегі № 69 көп қабатты үйдің ауласын гүлді баққа айналдыру үшін Татьяна Ибрагимованың қанша тер төккенін гүлзарға қарағаннан-ақ ұғыну қиын емес. Гүл өсірушінің өзі мұнымен шектелмейтінін айтады, өзінің туған қаласына деген сүйіспеншіліктің айқын үлгісін көрсетіп, гүлдің жаңа сорттарын отырғызуды жалғастырмақшы.
Жалпы Талдықорған қаласы әкімдігінің мәліметіне қарағанда, биыл облыс орталығында «Үлгілі аула» байқауы өтеді. «Бұл байқаудың басты мақсаты — қаланың кескін-келбетін жақсарта түсу, аулалардың таза, әрі жинақы болуын насихаттау. Сондай-ақ, аула аумақтарының санитарлық жағдайы мен көгалдандырылуын, абаттандырылуын қолға алу», — дейді сала мамандары.
Жетісу облысы әкімінің баспасөз қызметі
