Бүгін талдықорғандықтар Қазақстан Республикасының Конституция күнін атап өтті. «Жастар» саябағында өткен мерекелік шараға Алматы облысының әкімі Амандық Баталов қатысты, — деп хабарлайды taldykorgan-online.kz

Өңір басшысы өзінің құттықтау сөзінде: — Қазақстан Республикасының Конституциясы күні – жалпыұлттық мереке. Кемел келешектің кепілі болған Ата Заңымыз сіздер мен біздің құқығымызды қорғап, бейбіт өмір сүруімізді қамтамасыз етеді. Мемлекет басшысы Н.Ә.Назарбаев: «Еліміздің Тәуелсіздік тарихы – татулық пен тұрақтылық, бейбітшілік пен келісім шежіресі, мызғымас бірліктің жылнамасы. Байлық та, бақыт та – бірлікте», — деген болатын. Шын мәнінде, біздің бүгінде қол жеткізген жетістігіміз – бейбітшілік пен келісімді сақтаудың негізі болып табылады. Ширек ғасырда Тәуелсіз еліміз тұрақты даму жолына түсіп, биік белестерді бағындырды: кемел елге айналды, толағай жетістіктерге қол жеткізді, әлемдегі бәсекеге қабілетті елдердің қатарына енді. Президентіміздің көреген саясатының арқасында – мемлекетті дамытудағы стратегиялық бағдарламалар мерзімінен бұрын жүзеге асып келеді. Халықаралық қауымдастықта лайықты орын алған Қазақстанның бүгінгі күні биік белеске көтерілуі – осының айғағы, — деді.

Сонымен қатар, облыс әкімі А.Баталов: «Елдікпен берекенің бастауы, тыныштық пен ынымақтың негізі болып табылатын Ата Заң аясында бақытты өмір сүріп, баянды болашақ үшін еңбек етейік. Баршамыз үшін жерұйық мекенге айналған қасиетті отанымыз Қазақстан Республикасы гүденіп, өркендей берсін! Бүгінгі қастерлі мерекеде барша жетісулықтарға толайым табыс, бақ, дәулет, береке мен бірлік, мызғымас ынтымақ пен ырыс тілеймін. Еліміз өркендеп, Жетісу жері жайна берсін. Қазақстан Республикасы Конституция күні құтты болысын ағайын!», — деп өзінің жылы лебізін білдірді.

Облыс әкімінің құттықтау сөзінен кейін концерттік бағдарлама ұсынылды. Сүйінбай атындағы Алматы облыстық филармония мен Талдықорған әуендері фальклорлық ансамбілінің өнерпаздары және эстрада жұлдыздары ән шырқап, мереке көркін қыздырды.

Бөлісу
Share on FacebookTweet about this on TwitterEmail this to someoneShare on VK