Жетісу облысында 33 елді мекенге газдандыру жұмыстары жүргізіліп, 327 мың адам көгілдір отынға қол жеткізді. 2024 жылдың соңына дейін тағы 30 елді мекен қосылады. Ол үшін бюджеттен 12 млрд. теңге бөлінді. Осындай ақпаратпен Б.Құранбек атындағы Журналистер үйінде БАҚ өкілдерімен өткен баспасөз-мәслихатында облыстық энергетика және тұрғын үй-коммуналдық шаруашылық басқармасының басшысы Айдос Бекетаев бөлісті.
Басқарма басшысы атап өткендей, биыл жалпы сомасы 26 млрд. теңгеге жуық 42 жобалау-сметалық құжаттама әзірленді. Газдандырудың екінші кезеңімен Ақсу, Сарқан және Алакөл аудандарының елді мекендерін табиғи газбен қамтамасыз ету жоспарлануда.
«Бүгінгі таңда құны 131 млрд. теңге болатын «Талдықорған – Үшарал» магистральдық газ құбыры құрылысының жобалау-сметалық құжаттамасы әзірленді. Жобада ұзындығы 302 шақырым, 6 АГРС орнатумен магистральдық газ құбырын салу көзделген, бұл 124 мың тұрғыны бар тағы 66 елді мекенді газға қосуды ұлғайтуға мүмкіндік береді», — деді спикер.
Басқарма басшысы брифингте Талдықорған қаласында Жастар — 1 шағын ауданындағы ауыз су мәселесін де тілге тиек етті. Тұрғындардың айтуынша, мұнда кейбір көшелер де су жоқ болса, ал кейбірінде сапасы нашар. Қазіргі уақытта шағын аудан бойынша жоба дайын, мердігер компания да бар. Қаржы бөлінгеннен кейін реконструкциялау жұмыстары басталады. Ал кейбір жерлерге «Жетісу Су құбырымен» бірге судың қысымын реттеу жұмыстары жүргізілетін болады.
Жалпы облыс бойынша 325 елді мекен орталықтандырылған сумен қамтамасыз етілген. Биылғы жылы сумен жабдықтау жүйелерін салу және реконструкциялау бойынша 22 жобаны іске басталды. Уақытылы және сапалы іске асыру нәтижесінде 430 шақырымға жуық желі салынады, 20 елді мекенінде ауыз судың сапасы жақсарады. Қазіргі уақытта конкурстық рәсімдер жүргізілуде. 2025 жылдың соңына дейін орталықтандырылған сумен 331 елді мекен қамтамасыз етілетін болады.
