Бүгін облыс орталығы Талдықорған қаласында Халық банкінің 100 жылдығына орай, «100 қайырымдылық ісі» акциясы аясында заманауи үлгідегі шағын футбол алаңы ашылды.
Шара шымылдығын қала әкімі Ернат Бәзіл ашып, қаламызда спорт саласын дамытуда жүйелі жұмыстар жасалынып жатқандығына тоқталып, барынша қолдайтындығын ерекше айтып өтіп, балаларға доп тарату рәсіміне қатысты.
«100 қайырымдылық іс» акциясы жаңа құрылған үш облысқа сый ретінде сол өңірдің жас жеткіншектері мен тұрғындары үшін спорттық алаң және шағын футбол стадионын салып берсе, соның бірі Талдықорған қаласында ашылды.
«Өткен жылы Halyk Bank өзінің жүз жылдық мерейтойын атап өткен болатын. Халык Банк еліміздің барлық өңірлері бойынша ауқымды әлеуметтік жобаларды іске асыруды бастап, жүз жылдық мерейтойына орай, Halyk қоғамдық маңызы бар, әлеуметтік, мәдени және басқа да іс-шараларды іске асыруға бағытталған «100 игі іс» ауқымды акциясы бастау алып, Жетісу облысының құрылуына байланысты облыс және қала тұрғындарына заманауи үлгідегі жаңа шағын футбол алаңын сыйға тартып отыр», — деді «Қазақстан Халық Банкі» АҚ басқарма төрағасының орынбасары Ольга Вурос.
Шара аясында қала әкімі Ернат Бәзіл «Жастар» спорт- ойын түрлері клубының директоры Талғат Өмірбеков, Қазақстан құрамасының экс-капитаны, Қазақстанның үш дүркін чемпионы және Қазақстан кубогының үш дүркін иегері, қазіргі уақытта Жетісу ФК бас бапкері Қайрат Нұрдаулетов, Жетісу футбол клубының капитаны, Қазақстан ұлттық құрамасының ойыншысы, Қазақстанның алты дүркін чемпионы, Қазақстан кубогы мен Супер кубогының бірнеше дүркін иегері Серікжан Мужиков және Халық банкі Жетісу облыстық филиалының директоры Рахымжан Сереков жас спортшыларға естелік ретінде 60 доп тарту етті.
