Ұлттық мәдениеттің гүлденуі, салт- дәстүрдің одан әрі дамуы, ұрпақтар арасындағы сабақтастықтың ұлы жемісі қазақ тілі екендігінде дау жоқ.  Тәуелсіз елдің көпұлтты жас ұрпағының мемлекеттік тіл білуін қалыптастыру- маңызды іс!  Қасиетті тіліміздің болашағы  балабақшадан басталады.

 Эстония мемлекетінің «Иннове» білім беру орталығының тілге бойлау озық тәжірибесі, сараптаудан соң бүгінде қаламыздағы №42 балабақшада  жүзеге асырылуда. Мұндағы ерекшелік — жоба бойынша   өзге ұлт өкілдері бүлдіршіндері мен оладың  ата-аналарына мемлекеттік тілді оқыту ұйымдастырылуда.    Балабақша меңгерушісі  Гүлниса Тұлымшақова   мен қазақ тілі пәнінің  мұғалімі   Гүлмира Сайлауханқызы аталған жоба бойынша  халықаралық « Назарбаев зияткерлік мектептерінің  мектеп жасына дейінгі балаларды тілге бойлау  негізінде дамытуға арналған бағдарламасы» атты семинарға қатысып,  өз тәжірибелерімен  жиі  алмасып тұрады. 2019 жылдың қыркүйек айынан бастап эксперимент ретінде тәрбие ошағының   3-4 жастағы балаларына арнап   « Қазақша сөйлеп үйренейік!» қазақ тіліне бойлау жобасы қолға алыныпты. Ортаңғы « Улыбка» тобында  25 бала бар. Тәрбиеленушілердің  5-еуі  қазақ,   7-еуі орыс ,  5-еуі кәріс,  2 украин, және де  басқа ұлттардың балалары.

 Гүлмира Тұңғатарова қазақ тілі мұғалімі, жоба үйлестірушісі:

«Өзге ұлт өкілдерінің бүлдіршіндері мен қазақ тілін меңгермеген  балалар үшін қазақ тілін игеруді қамтамасыз ету мақсатында бұл жоба  эксперимент ретінде енгізіліп отыр. Аталмыш жоба өз  пайдасын бере бастады. Ең алдымен  балалар бір-бірімен қарым-қатынас орнатып отыр. Таңертең  есіктен кіре олар амандық сұрасады.  Олардың бойында бауырмалдық,  достық, ынтымақтастықты қалыптастыруда тілді меңгерудің пайдасы зор. Балдырғандар   тілді құрметтеуді балабақша қабырғасынан үйренуге бет бұрған. Жыл бойы өткізілген іс — шараларда бүлдіршіндеріміз   көп жетістіктерге жеткенін айтып өткім келеді. Бұл игі іске ата-аналар да тартылған. Баласымен бірге тіл үйренген ата-аналар түрлі сайыстарға  қатысып үлгерді.  Республикалық семинар-мониторингте  Нұр-Сұлтан қаласының «Тілге бойлау жобасын» үйлестірушісі Жанат Башарынқызы балабақшамызда өзге ұлт өкілдерінің бүлдіршіндеріне мемлекеттік тілді меңгерту бойынша жүргізіліп жатқан жұмыстарға оң баға берді».

«Келісіп  пішкен тон келте болмас» -дегендей,   балабақшада ата-аналармен бірлескен  жұмыстар  қарқынды жүргізіліп, өз нәтижесін бере бастапты.  Әр топтың  белсенділері   жетерлік.  Мәселен, Ирина Кан,  Денис Карпов, Олеся Кнор,  Николай Жумен, Юля Швейгер  балабақшада өткізілетін  іс-шараларға белсене атсалысады екен. Қала, облыс көлемде өтетін шараларғақатысқан  балалар мен ата-аналар ауыз толтырып айтарлықтай жетістіктерге қол жеткізіп үлгерген.  Сондай   белсенді ата- ана  Денис Карпов   пен  балабақша тәрбиеленушісі  Дамиан Нестеренко  «Қазақша сөйлеп үйренемін!»  атты республикалық акцияда батырлар жырын жатқа оқып, жүлделі орынды иеленді. Челлендж қорытындысында  олар  «Алғыс хатпен» марапатталыпты.

Денис Карпов, ата-ана:

-Менің ұлым    Роман тілге  бойлау  жобасы енгізілген топ  тәрбиеленушісі. Мемлекеттік тілді меңгеру — қазіргі уақыт талабы. Біз достығымыз жарасқан көп ұлтты  мемлекетте  тату – тәтті тұрып жатырмыз. Қазақ тілін шынайы достық   тілі  деп танимын. Тілге бойлау жобасы  балалардың мемлекеттік тілді меңгеруіне зор мүмкіндік береді, балалар арқылы ата-аналардың қазақ тілін үйренуіне ықпал жасайды.  Баламыз ерте жастан бастап тілге деген құмарлығы мен қызығушылығы оянды. Сол қасиеттерді дамыту  балабақшада жүріп жатыр.

Николай Жуменко, ата-ана:

-Көп тіл білгеннің артықшылығы көп.  Мемлекеттік тілді  бала жастан үйренгені жақсы емес пе?  Өз ортасымен емін-еркін араласып, сөйлеседі. Мектепте де пайдасы зор деп ойлаймын.   Отбасымызбен тілді  үйреніп жатырмыз.  Балам  өз қатарластарымен қазақша сөйлесіп, ән айтады. Мереке олардың ән-биімен өтеді. Топтағы балалар өте тату, соған қуанамыз. Қазақстан халқының бірлігі күні құтты болсын, барша талдықорғандықтар!

                                                                                                   

Бөлісу
Share on FacebookTweet about this on TwitterEmail this to someoneShare on VK