Жастайынан спортты өзіне серік еткен  Айдар Сепбосынұлы  Талдықорған қаласының тумасы. 10 жасынан спортпен шұғылданатын ол сүйікті қаласын бүгінгі келбетіне сүйсіне қарайды.

Жас спортшы туралы айтар болсақ, 2006 жылы Талдықорған қаласындағы Бақтыбай Жолбарысұлы атындағы №18 орта мектеп-лицейінің  1-сыныбына қабылданданып, 2015 жылы  аталған мектептің 9 сыныбын жақсы аяқтап шығады. Сол. 2015 жылы Талдықорған қаласындағы политехникалық колледждің « Дене тәрбиесі және спорт» бөліміне оқуға түседі. Аталған оқу орнын 2019 жылы  үздік дипломмен бітіріп шығады.

» Спортты таңдауыма отбасымда әкем Сепбосын Дәуренбековтің де өзіндік ықпалы болды деп айта аламын. Ол әскери күзетте жұмыс жасайды, ал анам Анар Садуақасова  мұғалім. Отбасында төрт баламыз. Мен  отбасында ата-анамның екінші перзентімін.  Әпкем-Толқын  балабақшада жұмыс жасайды. Інім Қанжығалы Айбек 10- сыныпта оқиды. Қарындасым Дария  мектептің  2- сыныбында оқиды.

 Өзім 10 жасымнан бастап спортпен шұғылданып келемін. Спорттың еркін күрес және  «Джиу-Джитсу Профи Файт», «Ұлттық жекпе-жек», «Панкратион», «Грепплинг» спорт  түрлерінен халықаралық, республикалық, облыстық  деңгейдегі жарыстардан кубоктар мен  көптеген жетістіктерім бар»,-дейді  жас спортшы.

 Айдар Сепбосынұлы оқу барысында спорт саласына қосқан айрықша үлесі үшін  «Үздік студент-2018»төсбелгісі мен куәлігіне ие болыпты.   Сондай-ақ, «Жас қыран» талантты жастардың ІІ кітап жинағына есімі енгізілген.

   Қазіргі уақытта  ҚР «Жекпе-жек ұлттық спорты», «Панкратион» және ММА түрінен  ҚР  құрама командасының мүшесі. Осы спорт түрлерінен  қол жеткізген жетістіктері де ауыз толтырып айтарлықтай.  «Жекпе- жек ұлттық спорт» түрінен халықаралық деңгейдегі спорт шебері және «Джиу-джитсу спортынан», «Панкратион спортынан» ҚР спорт шебері атақтар бар.

Спорт саласында және еліміздің өсіп- өркендеу жолында қосқан үлестері үшін көптеген марапаттарға ие болған. Атап айтсам, әлемдік деңгейдегі жарыстарда еліміздің көк туын желбіретіп, спортты дамытуға қосқаны үшін Алматы облысының жоғары спорт мектебінің  «Алғыс хатын» иеленген. Талдықорған қаласындаы жоғары политехникалық колледждің қоғамдық өміріне белсене араласып, спорттағы жоғары жетістігі үшін  «ҮЗДІК СПОРТШЫ» титулы мен  сертификатын да иеленген.  Сондай-ақ,  жігітке жеті өнер де  аз дегендей,  туған тілге де жанашырлық танытып келеді.

Мәселен, ҚР тілдерді дамыту мен қолданудың мемлекеттік бағдарламасы аясында өткен «Ұлы дала жыршысы» атты шығармалар байқауына қатысып,  2016 жылы мадақтамаға ие болыпты. Бұл ретте,  зейінді де зерек баланы  тәрбиелеп өсіргендері үшін   ата-анасына да білім ордасының Алғыс хаты табысталған.  Бұл да болса ата-ана үішн  үлкен мәртебе.

 Жас спортшы байрақты бәсекеде Азия, әлем чемпионаттарында  бірнеше мәрте топ жарып келеді. Жекпе-жек пен Греплинг спорт түрінен Алматы облысы чемпионатында 1-орын тұғырына көтерілген.

Джиу-Джитсу Профи Файт спорт түрінен ҚР чемпионатында 1 орын алды.  2016, 2017 жылдары   Қарағанды қаласы,  2018 жылы жекпе-жек ұлттық спорт түрінен  ҚР чемпионы  спорт шебері атағы берілді. Мұның бәрі жас спортшының алға ұмтылуына,  жігерін жани түсуіне сеп болды.

Халықаралық сайыстарға тоқталсақ. Азербайжанның  Баку қаласында өткен джиу-джитсу профи файт спорт түрінен 16-17 жас жасөспірімдер арасында өткен әлем кубогы үшін жарыста 1 орын ға қол жеткізді.   2016 жылы қазан айында Қырғызстанның  Бишкек қаласында, 2018 жылы өткен Азия чемпионатында чемпион болады.

 Сондай-ақ,  еліміздегі айтулы , маңызы зор  спорттық шараларға да қатысты.  Ол — 2017 жылғы 28-ші дүниежүзілік қысқы универсиада алауын алып жүру мәртебе ие болған алаугердің бірі. Алматы облыс әкімдігінің стипендиясының  иегері атанды. Мұның өзі  зор мақтаныш.

Нұрлан Аманқұлов, Алматы облысының Джиу-Джитсу Профи Файт федерациясы мен Жекпе-жек ұлттық спорт түрлерінен жаттықтырушы:

-Қанжығалы Айдар Сепбосынұлы  қазіргі уақытта  жекпе-жек ұлттық спорты және Джиу-Джитсу спортымен шұғылданып, ерекше көзге түсіп жүр.  Аталған спорт  түрлерімен айналысқанына 10 жылдан асты. Спорт залдағы жүйелі, тыңғылықты спорттық жаттығуларының арқасында көптеген байрақты бәсекелерде топ жарды. Облыстық, республикалық, тіпті әлемдік деңгейдегі жарыстарда еліміздің көк туын желбіретіп жүрген жас спортшы. Айдар өте талапты да табанды, еңбекқорлығымен ерекшеленеді. Спортшыға керек басты талап осы. Жаттығу-дайындықтардан ешқашан қалмайды,жауапкершілігі өте жоғары. Жаттығу залында спорттың түрлі әдіс-тәсілдерін жетілдіріп, өзін үнемі шыңдап отырады. Сондай-ақ, ол  кішіпейіл, өзінен жасы кіші спортшыларға өзінің білгенін үйретіп, қамқор болып жүреді.Айдар болашақта  еліміздіәлемге танытатын үздік спортшылардың бірі болатындығына  менің жаттықтырушы ретінде сенімім зор.

Болашағын туып  — өскен қаласымен байланыстырған Айдардың бұл спорттағы аздаған ғана жетістігі. Тәуелсіз елдің ұланы Айдар Сепбосынұлы — бүгінде  Алматыдағы   Қазақ спорт және туризм академиясының студенті. Оның болашақтағы арманы өзі қалаған мамандығымның иесі атанып, еліміздің  өсіп-өркендеуіне үлесін қосу және әлемдік деңгейдегі спорттық додаларда көк туымызды  биікте желбірету.  Арманыңа жете бер, Айдар!

                                                                                             

 

Бөлісу
Share on FacebookTweet about this on TwitterEmail this to someoneShare on VK