Жаңа жыл қарсаңында Алматы облысының тілдерді дамыту жөніндегі басқармасының ұйымдастыруымен қолға алынған «Жетісу – кітапқұмарлар өлкесі» байқауының  жеңімпаздары анықталды.

Онлайн режимінде өткен кітапқұмарлар додасы Әбу Насыр Әл-Фарабидің 1150 жылдығына және Абай Құнанбайұлының 175 жылдығына орайластырылып ұйымдастырылған еді.

Облыстық тілдерді дамыту жөніндегі басқарманың басшысы Болат Керімбек   :

-Баршаңызға қайырлы күн! Алдағы келе жатқан Жаңа жыл мерекесі құтты болсын! Кітап – адам жан-дүниесінің асыл қазынасы, рухани байлықтың өлшемі. Ғабит Мүсірепов: «Кітап дегеніміз –алдыңғы ұрпақтың артқы ұрпаққа қалдырған рухани өсиеті. Кітап оқудан тыйылсақ, ой ойлаудан да тыйылар едік»,-деген.

 Өздеріңізге белгілі, Жетісу  тұрғындарының  кітап оқу мәдениетін қалыптастыру, ынталандыру, сондай-ақ, қазақ және шетел жазушыларының үздік шығармаларын насихаттау мақсатында «Жетісу –кітапқұмарлар өлкесі» байқауын  жариялаған болатын.  Байқауға 341 адам қатысты, ережеге сәйкес іріктеу кезеңіне 245, оның ішінде 125-і оқушылар, студент –жастар 43 және де  77 тұрғын қатысып, бақ сынады. Ең жас қатысушы 14-те болса, 65 жастағы қариямыз да атсалысты» ,-  деп ойын түйіндеді.

  Айтар болсақ, үміткерлер екі кезең бойынша іріктеуден өтті. Бірінші кезеңде 9-11 сынып оқушылары Абайдың қара сөздері мен Мұхтар Мағауинның «Бір атаның балалары» шығармасын оқыса, студенттер мен ересектер әл-Фарабидың «Қайырымды қала тұрғындарының көзқарасы туралы трактат» және тізімде көрсетілген көркем әдеби шығармадан бір кітап, мотивациялық бір кітап оқыды. Байқаудың тағы бір ерекшелігі – қазақ және орыс тілдерінде жазылған кітаптар тізімі бойынша қатысушыға өзіне ыңғайлы тілді таңдау еркіндігі берілді. Яғни, қатысушы өзі оқыған кітабы бойынша қысқаша мазмұнын өзі таңдаған тілде жазып өткізді.

Екінші кезеңде берілген кітаптарды толық оқып, қазылар алқасының ұпай санына сәйкес іріктеуден өткен қатысушылар оқыған шығармалары бойынша онлайн тестілеу тапсырған көрінеді. Аса жоғары белсенділік танытқандар қатарында  Талдықорған қаласы, 47 адам қатысса, одан кейін Іле, Балқаш, Талғар, Алакөл, Еңбекшіқазақ аудандары бар.

 Қазылар алқасының және тест тапсырмасының нәтижесіне сәйкес үш санат бойынша іріктелген байқау жеңімпаздары жеке-жеке анықталды.  Ересек топ бойынша  I орын Мөлдір Стаханова, Бақыт Мамбетова( Талдықорған қаласы), II орын Аида Маметканова, Гүлзира Ахметова, (Талдықорған қаласы), Балшекер Пірназарова (Қарасай ауданы), III  орыннан   Мүлік  Дәулеткерей, Құрметбек Сансызбай (Талдықорған)  көріне білді.

Студенттер мен жастар бойынша I орынға ие болған  Райымбек ауданынан Гүлдана Рамазан ,  талдықорғандық Арайлым Мылтықбаева , Ақерке Жиенқұлова   жеңімпаз атанды.

Оқушылар арасында  I орын Талдықорған қаласы «Білім-инновация» мектеп лицейінің 10 сынып оқушысы Еркебұлан Советов, Аружан Саятова,  II орынды Еңбекшіқазақ ауданы Қызылшарық ауылы М.Әуезов атындағы мектептің 9 сынып оқушысы Шұғыла Бектұрсын, Алакөл ауданы Тоқжайлау ауылы Тоқжайлау орта мектебінің 10 сынып оқушысы Оразхан Аяжан, Алакөл ауданы Қабанбай ауылы О. Молдағожин атындағы орта мектептің 9 сынып оқушысы Айгер Нұрбек,  Талдықорған қаласындағы №18 мектеп-лицейдің  10 сынып оқушысы Рахимбек Асылзат иеленді.Одан әрі 3-орынға Іле, Көксу, Талғар аудандарымен қоса, Талдықорған қаласындағы  «Білім-инновация» мектеп лицейінің 9 сынып оқушысы  Алдан Жұмағазы лайық деп танылды.

Сондай-ақ, екінші кезеңге өткен жүздеген қатысушы да марапатқа ие болды. Барлық жеңімпаздарға басқарманың атынан  диплом, Алғыс хаттар және де планшет, электронды және бағалы кітаптар сияқты арнайы сыйлықтар табысталды.

                                                          

Бөлісу
Share on FacebookTweet about this on TwitterEmail this to someoneShare on VK