Суретті түсірген А. Нұршанов

«Мектепке жол» дәстүрлі республикалық қайырымдылық шарасына арналған баспасөз конференциясы Өңірлік коммуникациялар қызметі алаңында өтті. Оған Алматы облысы білім басқармасы басшысының орынбасары Сүлейменова Жаныл Мағданқызы қатысты.

Спикердің айтуынша, әлеуметтік бағыттағы бастама  жыл сайын  1 тамыздан 30 қыркүйекке дейін жүргізіледі. Акцияның мақсаты-  көп балалы, аз қамтылған отбасыларының балаларына  көмектесу,  баланың мектепке бармай қалуының алдын алу. Жыл сайын  өтетін қайырымдылық шарасы  биыл Қазақстан Республикасы Президентінің  тапсырмасымен көмекке мұқтаж балаларды барынша қамту мақсатында 3 шілдеде басталды. Осыған байланысты, 2019 жылдың 5 шілдесінде облыс әкімінің «Мектепке жол» акциясын өткізу туралы №78-ө-к өкімі шығып, акцияны ұйымдастыру комитетінің құрамы мен жұмыс жоспары бекітілді.

Жаңа оқу жылының қарсаңында  қолға алынған шара биылғы жылы «Жүректен -жүрекке» ұранымен өткізілуде.

Ж. Сүлейменова, облыстық білім басқармасы басшысының орынбасары:

-Біз ата-аналарға баланы мектепке дайындауға жан-жақты  көмектесеміз. Бұл — кеңсе тауарлары, мектеп формалары, спорттық киім, аяқкиім. Білім басқармасы тарапынан акция аясында атқарылған жұмыс нәтижесі бойынша әр  10 күн сайын мониторинг жүргізіледі.  Көмекке мұқтаж  30 мыңнан астам баланың тізімі жасалды. Бүгінге дейін 770 балаға демеушілер тарапынан 9 млн.теңгенің көмегі көрсетілді.

Жалпы алғанда, облыста 760 мектепте 390088 оқушы болса, оның 16176-сы көпбалалы, 14545-і аз қамтылған және сәтсіз отбасының 1459 баласы тіркелген. Өткен 2018 жылы 36 мыңнан астам балаға 350 млн. теңгенің қайырымдылық көмегі жасалды. Бұл қаржының 208 млн.теңгесі демеушілер тарапынан бөлінді. Осылайша жылдан-жылға акцияның ауқымы кеңейіп, тұрақты демеушілер  қатары артып отыр,-деді.

Әлеуметтік себептермен мектепке бармай қалатын балаларды анықтау мақсатында  аудан мен қалаларда рейдтік шаралар  жүргізіледі.  Сондай-ақ, демеушілер мен меценаттардың мұқтаж балаларға көмектесуін, төмендетілген бағада мектеп тауарларын сату үшін мектеп жәрмеңкесі  ұйымдастыру қолға алынуда.

Балалар мен ата-аналарды ыңғайсыз жағдайда қалдырмау мақсатында қайырымдылық көмек шарасы   ешқандай салтанат жасамай-ақ өткізіледі.

Осы талап бойынша білім басқармасы тарапынан аудандық, қалалық білім бөлімдеріне хат жолданды.

Көмекке мұқтаж балалардың тізімін кімдер жинақтайды, кейбір құжаттары жоқ балалар анықталған жағдайда қандай жұмыс атқарылады деген  БАҚ өкілдері сауалдарына спикер  толыққанды жауап берді.  Бірінші сауал бойынша мұқтаж отбасылардың балалары тізімі мектепте жинақталып,  жергілікті білім бөліміне өткізіледі. Ал, құжатсыз балалар анықталған жағдайда  бұл іспен қамқоршылық және қорғаншылық бөлімдері айналысады.

Талдықорған қаласында 2018 жылы  «Мектепке жол» акциясы аясында аз қамтылған отбасындағы тәрбиеленіп жатқан 2826 балаға жалпы 36,1 млн. теңге көлемінде материалды көмек көрсетілді. Оның ішінде 1326 балаға демеушілер тарапынан көмек көрсетілді. Ал, 1500 бала бюджеттік қаражат есебінен (жалпыға бірдей білім беру қорынан) киім-кешек,  оқу құрал-жабдықтарымен қамтамасыз етілді.

Бөлісу
Share on FacebookTweet about this on TwitterEmail this to someoneShare on VK