Талдықорғанда «Жастар – жарқын болашақ үшін!» атты жастар форуымы өтті. Аталмыш шараны Алматы облысының жастар саясаты мәселелері басқармасы мен қалалық жастар ресурстық орталығы ұйымдастырған. Форумға 300-ге жуық студент қатысты, — деп хабарлайды taldykorgan-online.kz

Мұндағы мақсат – 9 маусым күні елімізде болатын Президент сайлауына жастарды шақыра отырып, олардың белсенділігін күшейту. Жас ұрпақтың еліне, жеріне деген сүйспеншілігін арттыру.

Жиында Қазақстан халқы Ассамблеясының өкілі Несіпжамал Қасымбекқызы жас буынды сайлау науқанында дұрыс таңдау жасауға үндеді. Ол өз сөзінде:

— Айналайын жастар, өздерің жақсы білесіңдер алдағы уақытта елдің тағдырын шешетін үлкен саяси науқан болғалы тұр. Барлығыңның көздерің ашық, көкіректерің ояу деп білемін. Теледидардан, интернеттен елімізде болып жатқан қазіргі ахуалды көріп жүрсіңдер ғой. Сайлауға қатысу – әр адамның азаматтық борышы. Егер сен өзіңді адам ретінде, тұлға ретінде сыйлап, ел алдындағы отансүйгіштік қасиетіңді көрсеткің келсе, онда міндетті түрде сайлауға қатысып, қалаған үміткерге өз даусыңды беруің тиіс. Мемлекетімізге әділ басшы келуін тілейік. Еліміз аман, жұртымыз тыныш болсын!, — деді.

Сонымен қатар, Несіпжамал Баймолдиева қазір білімнің, ғылымның дамыған кезеңі екендігін айта келе жастарды тек алға қарай ұмтылуға шақырды. Ал, жас кәсіпкер Елдос Баялшыбаев студенттерді жігерлендіру мақсатында өмірлік тәжірибесімен бөлісіп, ақыл кеңестерін айтты.

«Достар, өмірде бізге бір рет қана мүмкіндік беріледі. Сол орайлы сәтті ұтымды пайдалана білуіміз қажет. Адамдарға әр сала бойынша дамуына жан-жақты мүмкіндіктер қарастырылған. Армандап қана қоймай, тез арада әрекетке көше білу өте маңызды. Күн сайын өзімізді қамшылап, алдағы межеге жету үшін аянбай тер төгуіміз керек. Сонда ғана биіктен көрінеміз. Осы орайда сендерге өз мүмкіндіктеріңді пайдалана біліңдер дегім келеді. Егер мен арбада құр қол қусырып отыра бергенімде, жеке кәсібім болып, үлкен жетістікті бағындырмас едім ғой», — деп өзін мысалға келтірді. Сөзінің соңында сайлау барысында белсенділік таныту керектігін де айтып қалды.

Одан бөлек, жас кәсіпкер Досжан Қыдырханов, Жастар қанатының кеңесшісі Нұржан Молдахметов және Ілияс Жансүгіров атындағы Жетісу мемлекеттік университетінің білімгері Әли Құсайынов ортаға шығып, жастарды сайлауға қатысуға шақырды. Форумның соңы концерттік бағдарламаға ұласты.

Бөлісу
Share on FacebookTweet about this on TwitterEmail this to someoneShare on VK