өңіраралық жұмыспен қамту
Суретті түсірген Данияр Сағындықов

Алматы облысында еліміздің Қостанай, Павлодар, Шығыс Қазақстан, Солтүстік Қазақстан облыстарынан келген делегация жұмыспен қамту бағдарламасы аясында халықпен кездесті. Өңіраралық  бос орындар жәрмеңкесі Талдықорған қаласындағы жастарға қызмет көрсету орталығындаұйымдастылылды.

Басқосуда  «Нәтижелі жұмыспен қамтуды  және жаппай кәсіпкерлікті дамытудың 2017-2021 жылдарға арналған «Еңбек»  мемлекеттік бағдарламасының  жүзеге асырылуы, сондай-ақ, мектеп бітіруші түлектер үшін «Серпін» бағдарламасы бойынша түсіндіру жұмыстары жүргізілді. Делегация құрамы  әр аймақтың  аудан,  ауылдық округі әкімдері,  жұмыспен қамту саласының өкілдері мен жұмыс берушілерден тұрады. Маңғыстау, Қызылорда, Түркістан, Жамбыл, Алматы облыстарында өткізілетін бос орындар жәрмеңкесінің өзіндік маңызы зор.

«Солтүстік өңірлерде жұмыс қолының тапшылығы сезіледі. Егер де   жұмыс берушілердің   ұсыныстары ұнап, жұмыс істеу үшін солтүстікке қоныс аударатын болса, онда азаматтарға  үй, жер беріліп, кәсібін, шаруашылығын  әрі қарай дамыту  үшін түрлі көмектер көрсетіледі. Сондықтан, аталған жәрмеңке,  облыс тұрғындарына  мамандықтары  бойынша жұмыс табуға көмектеседі деген үміт бар. Осы орайда, мемлекет  жол пұлын және бір жыл бойы баспана жалдауға кететін шығынды өтеуге субсидия бөлетінін атап өткен жөн. Еңбек күші артық өңірлерден жұмыс қоры тапшы аймақтарға қоныс аудару жұмыскер мен жұмыс берушінің өзара қызығушылығы бойынша ерікті түрде жүзеге  асырылады»,- дейді шара  ұйымдастырушылары.

Ауыл шаруашылығы, ветеринар, медицина, педагогикалық, техникалық  мамандықтар бойынша бос орындар көп. «Былтыр  Шығыс Қазақстан облысының  Тарбағатай  ауданына 7 отбасы  Түркістан облысынан  көшіп барды. Бүгінде олар өздерінің отбасылық кәсібін дамытып, қанаттарын кеңге жайып отыр» – деді  аудандық жұмыспен қамту орталығының директоры Т.Жақыпбаев көпшілікпен болған кездесуде.

Өңіраралық  бос  жұмыс орындары  жәрмеңкесі бірнеше жыл қатарынан өткізіліп келеді. Қоныс аударған азаматтар сол өңірлерден жеке тұрғын үй алып, отбасының жұмысқа жарамды азаматтары толығымен жұмыспен қамтылған. Мәселен, Шығыс Қазақстан облысында қоныс аударушыларға арнап   тұрғын  үй салу жұмыстары қолға алынған.  Сондықтан да болар, 2018 жылы Алматы облысынан 481 адам қоныс аударса, 2019 жылдың  3 айында 40 отбасы көшіп барып, жұмыспен, баспананмен қамтылған.  Панфилов ауданынан Катонқарағай ауданына көшіп барған жас отбасы жастар орталығынан жұмыс тапқан.

Сондай-ақ, «Туған жерге тағзым» жобасы бойынша  ауылдың  меценаттары   10 үйді салуды қолға алған.  Оны қоныс аударушылардың  отбасына тегін сыйға тартпақшы.

Солтүстік  Қазақстан облысынан келген делегация өкілдері  аймақтың  негізінен  егін шаруашылығымен айналысатындықтан техникалық, ауыл шаруашылық мамандықтарына  сұраныс бар екендігін жеткізді.

Шара барысында  облыс тұрғындарына  400-ден  аса  бос жұмыс орындарын ұсынылды.

Бөлісу
Share on FacebookTweet about this on TwitterEmail this to someoneShare on VK