Талдықорған қаласының «Жастар» саябағында «Қош келдің, Жаңа 2025 жыл!» атты мерекелік шара ұйымдастырылды. Өңір тұрғындарын Талдықорған қаласының әкімі Ернат Бәзіл құттықтап, жылы лебізін білдірді.
«Өтіп бара жатқан жыл біз үшін жетістіктерге толы болды. Бұл жылы Талдықорған қаласының дамуы мен гүлденуі жолында бірқатар маңызды жұмыстар атқарылды. Қала тұрғындарының әл-ауқатын арттыру, әлеуметтік және инфрақұрылымдық жобаларды жүзеге асыру бағытында табанды еңбек еттік. Бірлесе қол жеткізген жетістіктерімізге мақтанышпен қараймыз.
Жаңа жыл — жаңа үміттер мен жоспарлардың бастамасы. Алдағы жылы біз қаламыздың әлеуметтік-экономикалық дамуына жаңа серпін беріп, әрбір тұрғынның өмір сапасын жақсартуға бағытталған жұмыстарды жалғастыратынымызға сенімдімін. Біз бірге Талдықорғанды әрі қарай гүлдендіре аламыз!
Баршаңызға зор денсаулық, амандық, бақыт пен тыныштық тілеймін. Жаңа жыл әрбір отбасына қуаныш, береке және табыс әкелсін. Жаңа жылда барлық арман-мақсаттарыңыз орындалып, тек жақсылықтар мен қуаныштар болсын!» — деді қала әкімі Ернат Бәзіл.
Шара барысында қала бойынша нысан қасбеттерін мерекеге сай әдемі безендіргендер арасында өткен «Үздік Жаңа жылдық безендіру» байқауының жеңімпаздары марапатталды. Байқауға 30-дан аса нысан қатысып, үздік үштік анықталды. Атап айтқанда, І-орынды «НАШ» азық-түлік дүкені, ІІ-орынды «Olivia» кафесі иеленсе, ал үштікті «MAX CREAM.KATANA.RUCOLA» мейрамханасы місе тұтты. Қалған үміткерлерге ынталандыру сый-сияпаты тарту етілді.
Қала басшысы Ернат Бәзіл саябаққа жиналған жұртшылықпен бірге мерекелік от- шашуды тамашалап, жергілікті өнерпаздардың концерттік бағдарламасын тамашалады.
