Талдықорған қаласының әкімі Ернат Бәзіл UCMAS бағдарламасы бойынша халықаралық ментальді арифметика олимпиадасының жүлдегерлерін қабылдады,- деп хабарлайды қала әкімінің баспасөз қызметі.
Ағымдағы жылдың 14-15 желтоқсан күндері Үндістан астанасы Нью-Дели қаласында өткен UCMAS бағдарламасы бойынша халықаралық олимпиадаға қала мектептерінің 5 оқушысы қатысып, жүлделі орындардан көрінді. Қала әкімі оқушыларды жеткен жетістіктерімен құттықтап, алғыс хаттарын табыс етті.
Қала әкімі Ернат Бәзіл өз сөзінде: — «Сіздердің білімдеріңіз бен жоғары нәтижелеріңіз біздің әсем қаламыз Талдықорғанның жетістігі деп білемін. Сіздер өздеріңізге қойған мақсатқа жету жолында үлкен еңбек еттіңіздер. Бұл сіздердің болашақтағы жетістіктеріңіздің алғашқы қадамы ғана. Жаңа биіктерді бағындыра беріңіздер», — деп балаларға алдағы уақытта да үлкен жетістіктер тілеп, сәттілік тіледі.
Мұндай шара балалардың білім алуына ғана емес, сондай-ақ олардың өзіндік дағдыларын дамытуға септігін тигізбек.
