Елбасы Нұрсұлтан Әбішұлы Назарбаев кезекті Жолдауында ел экономикасын ілгерлете отырып һәм бұқара халықтың әл ауақтын көтеру мақсатында мемлекет дамуының даңғыл жолдарын көрсетіп берді. Әр салаға жекеше тоқтала келе күн тәртібінде тұрған өзекті мәселелерді тілге тиек етті. Соның ішінде спортқа да ерекше көңіл бөле кеткені бізді қуантты.

Президент өзінің биылғы үндеуін «Қазақстандықтардың әл-ауқатының өсуі: табыс пен тұрмыс сапасын арттыру» деп отырғаны тегін емес.

Елмен бірге Жолдауды бізде тыңдадық. Мемлекет басшысы өңірлік деңгейдегі резервтерді тауып, бұқаралық спорт пен дене шынықтырудың қолжетімділігін арттыру қажет екендігін қадап айтты. Сондай-ақ,  үкіметке және әкімдерге кем дегенде 100 дене шынықтыру-сауықтыру кешенін салуды тапсырды. Нәтижесін күтеміз.

Егер Елбасымыздың жүргізіп отырған сарабдал саясаты жүйелі, әрі жоспарлы бағытта іске асса, мұның барлығы бұқаралық спорттың дамуына жақсы. Яғни, қазақ спортының мәртебесі биік болады деген үміт бар. Сонда өскелең ұрпағымыздың дені сау болып қалыптасып, келешекте жастарымыз мемлекетіміздің өркендеуіне өз септіктерін тигізеді деп ойлаймын.

Нұрбақыт Теңізбаев, грек-рим күресінен

Бейжің Олимпиадасының күміс жүлдегері.

Бөлісу
Share on FacebookTweet about this on TwitterEmail this to someoneShare on VK