Кәрістер талдықорғандықтардың үйлерін тегін жөндеп жүр

728

Корей Республикасымен достық қатынас жылдан-жылға дамып, нығайып келеді. Осы жылдың маусым айында Талдықорған қаласы әкімдігі мен Корей мәдени орталығы және  «Frend Azia» Корей қайырымдылық қорының өкілдері арасында меморандумға қол қойылған болатын. Биыл кәріс ағайындардың елімізге депортацияланғанына 80 жыл.

1937 жылдың қиын-қыстау кезеңінде, кәрістерді бауырына басып, бір үзім нанымен бөліскенін тарихтан жақсы білетін ұрпақтары Қазақстан халқына алғыс ретінде құрмет танытуда. Қаламызға келген Корей делегациясы 80 жылдыққа байланысты 84 үйге көмек беруді жоспарлап, аз қамтылған корей және басқа да ұлт өкілдерінің үйлеріне күрделі жөндеу жүргізуді мақсат тұтқан болатын. «Frend Azia» Корей қайырымдылық қоры мұндай іспен 20 жылдың көлемінде айналысып келеді. Қырғызстан, Өзбекстан және басқа да корей халқы қоныс тепкен мемлекеттерде кішігірім акциялар өткізіп, мұқтаж жандарға қайрымдылық көрсетуді жалғастыруда. Ал, үлкен  шара Алматы облысынан  бастау алып отыр. Себебі, елінен қоныс аударған кәрістердің бірінші легі осы облысымыздың Қаратал ауданына орналасқаны белгілі. Үш жылға жасалған келісімшарттың аясында  биыл 30 аз қамтылған отбасына қамқорлық таныту жоспарланғанымен, 35 үйге түрлі жөндеу жұмыстары жүргізіліпті. Оған Талдықорған политехникалық колледжінің  студенттік құрылыс топтары тартылған. Кореядан келген инженер-құрылысшылар отандық өнімдерді қолдана отырып, білімгерлерге өз тәжірибелерін үйретіп, құрылыс жұмыстарының қыр-сырына баулыды.

Жанатбек Бекбаев, «Қазақ соқырлар қоғамының» Алматы облыстық филиалының төрағасы:

— Өзіміз еңбек ететін ғимаратты жөндеуге  шамамыз келмейтін болған соң қалалық әкімдікке, тағы да басқа әлеуметтік сала басшыларына өтініш жазып, хат жолдадым. Қуанышты хабар да көп күттірген жоқ. Кәріс ағайындар хабарласып, ғимараттың бір бөлмесіне және мәдени шаралар өткізіп жүрген клубқа есік-терезе орнатып, еденін жаңалап берді. Сонымен қатар, жұмыссыз, әлеуметтік жағдайы сын көтермейтін 3 адамға көмек берді.

Рәзия Оразбаева, «Қазақ соқырлар қоғамының»мүшесі, 1-топ мүгедегі:

— 2014 жылы жаңа үйге қоныс аудардық. Төртінші қабаттағы пәтеріміз көпқабатты үйдің бұрыш жағында  орналасқандықтан, ашық  балконнан үнемі жел үрлеп тұратын. Жуырда Корей қауымдастығынан арнайы адамдар келіп, балконымызды толықтай жауып берді. Жұмыстары өте сапалы, жауапкершілікпен атқарылғанын келіп көргендер айтып жатыр. Жуырда тағы да қал-жағдайымызды сұрап, азық-түлікпен көмектесіп кетті. Осынау іске мұрындық болған барша азаматтарға  айтар алғысымыз шексіз. Бізге жасаған қайырымдылықтары өздеріне еселеніп қайтсын!

Анатолий Акимов, «Қазақ соқырлар қоғамының» мүшесі, 1-топ мүгедегі:

— Пәтерімді  алғаныма 27 жыл болыпты. Денсаулығыма байланысты жөндеу жүргізе алмадым. Енді міне, жауапты сала басшылары мен кәріс бауырлардың арқасында үйім толықтай жаңаланып қалды. Есік-терезелері ауыстырылды, еденнің барлығы  жаңартылды. Ол кісілерге шексіз ризамын. Ешқашан жамандық көрмесін, мықты денсаулық тілеймін!

Келер жылы кәріс бауырлар тағы 30 отбасына көмек беру көздесе, 2019 жылы 20 отбасына қайырымдылық жасауды жоспарлап отыр.

Бөлісу
Share on FacebookTweet about this on TwitterEmail this to someoneShare on VK