Мемлекет басшысы Қасым-Жомарт Тоқаев «Egemen Qazaqstan» газетіне берген сұхбатында ағымдағы жылы елімізде атқарылар маңызды істер мен қандай міндеттер тұрғанын баса айтты.
Экономикалық, қоғамдық-саяси және гуманитарлық салаларда атқарылатын жұмыстың негізгі бағыт-бағдары жуық арада айқындалатынын, сындарлы әрі салиқалы сыртқы саясат жалғасатындығын атап өтті. Мәселен биыл елімізде бірқатар ауқымды саммит, форумдар өтіп, бірқатар беделді халықаралық ұйымдарға төрағалық етеді. Сондай-ақ, дүниежүзілік көшпенділер ойынын өткізу де еліміз үшін айтулы оқиға болмақ. Бұл жөнінде Президент «Байрақты бәсеке ұлттық спорт пен саламатты өмір салтын дәріптеу жағынан да, Ұлы даладағы көшпенділер өркениетінің мұрагері саналатын бауырлас халықтардың мәдени-гуманитарлық байланысын арттыру тұрғысынан да маңызды екені сөзсіз»,- деді. Ел тарихында ерекше орны бар тұлғаларға құрмет көрсету дәстүрі де жалғасын таппақ. Биыл әйгілі ғалым Қаныш Сәтбаевтың туғанына 125, даңқты батырлар Сағадат Нұрмағамбетов пен Рақымжан Қошқарбаевтың туғанына 100 жыл, Жошы ұлысының іргесі қаланғанына – 800 жыл. Осы айтулы датаға орай кең ауқымды зерттеулер қолға алынады деп жоспарлануда. Сонымен қатар, өзімізден 200-ден астам, шетелден 60-қа жуық маман жұмыла жасап жатқан Қазақстан тарихының көптомдығын әзірлеу жұмыстары да аяқталмақ. Жалпы, сұхбаттан түйгенім осындай маңызды оқиғалардан бөлек, күнделікті атқарылуға тиіс жұмыстар да аз емес.
Мәрия Ботаева, кітапханашы
