1 қыркүйек – Білім күні. Сыңғырла, күміс қоңырау!

186

Қоңыр күздің алғашқы күнімен келетін алғашқы қоңырау салтанаты ел аумағында жыл сайын ерекше тойланады. Үш ай демалыстан соң, алтын ұя мектебіне сағына жеткен мұғалімдер мен оқушылардың қуанышында шек жоқ. Тағы бір оқу жылы артта қалып, жаңа 2023-2024  оқу жылы басталды.

Бұл  күні  алтын ұясына сағына ұм­тылып, шұрқыраса табысатын шә­кірттердің ғана емес, білім мен тәрбиені кие тұтқан абзал ата-аналар мен ұлағатты ұстаздың да мерейлі мерекесі. Бұл кү­ні қариялар немересін мектепке жете­лесе, табалдырығын жаңа аттаған бүл­діршіндердің көңілі алып-ұшып, алғашқы ұстазымен қауышқанша тағатсыздана асығады. Иә, 1 қыркүйекте еліміздің барлық өңірінде алғашқы қоңырау соғылып, балалар мектепке барды.

Талдықорған қаласы  бойынша 1 қыркүйек күні 33 мыңнан аса оқушы мектепке барады. Олардың 3518-і алғаш рет мектеп табалдырығын аттағалы отырған бүлдіршіндер.

Жалпы білім беретін ұйымдардың, барлығы 26 мектептерде жаңа оқу жылына дайындық жұмыстары аяқталып, оқушыларды қабылдауға дайын. Ынтымақтағы жаңа мектеп құрылысы аяқталуға жақын.

Бұған қоса, 1-4 сынып оқушылары биылғы жылдан бастап белгілі бір санатсыз барлығы ыстық тамақпен қамтылмақ.  Білім алуға қажетті оқулықпен толық қамтылып отыр. Қалалық білім бөлімінің мәліметінше,  12 баспаға 90 мыңдай оқулыққа тапсырыс берілген. Оқу құралдары жеткілікті.

Естеріңізге салсақ, өткен оқу жылы 1263 түлек  мектеп қабырғасын аяқтап, қолдарына аттестат алды. Оның 34-і  «Алтын белгі» иегері атанса, 93-і ерекше үлгідегі атестатпен бітірді.  Айта кетейік, 1263 оқушының 638-і жоғары  оқу орындарының  білім гранттарын иеленіп, студент атанды. Тағы бір жаңа оқу жылы басталып, оқушыларға білімнің кені мектеп құүшағын айқара ашты. Білімді де, зерек, талантты оқушылардың жетістіктері мол болсын!

ЖАУАП ҚАЛДЫРУ

Пікіріңізді енгізіңіз!
мұнда сіздің атыңызды енгізіңіз