Абай облысындағы алапат өрттен қаза болған азаматтар туралы қаралы хабарды бүкіл еліміз халқы қатты қайғыра қабылдады. Тілсіз жаудың күллі тіршілік иелеріне қандай зардап әкелетінін, соңы орны толмас өкінішке әкеп соғатынын тағы да дәлелденіп отыр. Мемлекет басшысы Қасым-Жомарт Тоқаев апат болған аймаққа арнайы барып тұрғындарымен кездесіп, өз күйзелісін жеткізді. Әрі 12 маусымды жалпыұлттық аза тұту күні деп белгіледі.
Осыған байланысты халқымыз бүгін аза тұтып, қаза тапқан қаһармандарды қайғыра еске алуда. «Болған іске болаттай берік бол» дейді даналарымыз. Біздің Талдықорған қалалық ардагерлер ұйымы өрт сөндіру қызметкерлерінің қазасына қайғыра отырып олардың отбасына, туыс-туған жақындарына шынайы көңіл айтады. Сондай-ақ, алдағы уақытта мұндай зілзала қайталанбаса екен деп тілейді. Алла тағала қара жамылған жанұядағыларға сабыр, тілсіз жаумен көз ілмей күресіп жатқан азаматтарымызға күш-қуат берсін! Әр күйзелістің артында жақсылық бар. Еліміз аман, жұртымыз тыныш, болашағымыз нұрлы болсын!
Мұратбек Қожабеков, Талдықорған қалалық ардагерлер кеңесі төрағасының орынбасары.
