Биыл жазиралы Жаркент өңірінің төл тумасы, белгілі журналист, адуынды айтыс ақыны, Айтақын Бұлғақов 60 жаста. Асқаралы асуға қадам қойған арқалы ақының мерейтойы алдағы маусым айында жер жәннаты Жетісуда айырықша аталып өтілмек. Осыған орай Талдықорған қаласында ақынмен «Ақындар сөзі – тәрбие көзі» атты кездесу өтті. Облыс орталығындағы бірқатар қаламгерлермен жастардың басын қосқан рухани шараны Сәкен Сейфуллин атындағы Алматы облыстық әмбе-бап кітапханасы  ұйымдастырған.

«Елбасының «Рухани жаңғыру: болашаққа бағдар» бағдарламасы аясында қолға алынған  бұл игі шараның басты мақсаты – сүбелі сөз өнері арқылы жастардың санасында ұлтымыздың ұлы салт-дәстүрін, әдеп-ғұрпын жаңғыртып, төл мәдениетімізді кеңінен дәріптеу», – дейді ұйымдастырушылар.

Қазақ ауыз әдебиетінің айшықты жанры айтыс өнерінде биік орны бар Айтақын Бұлғақов қазір Алматы облыстық «Алатау» қоғамдық-саяси газетінің бас редакторы. Небір аламан айтыстарда бәйге атындай топ жарып жүлде алумен қатар Моңғолия Демократиялық партиясының «Моңғолия тәуелсіздігінің, азаматтарының құқығын қорғаудағы ісіне қосқан үлесі үшін» орденімен, Моңғолиядағы Қазақ жастары одағының «Көшбасшы» алтын жұлдыз медалімен марапатталған. Сондай-ақ, «Ақындар жыры — Ақ орда», «Тәуелсіздік — тағдырым», «Нұр Отан» халықтық демократиялық партиясына — 10 жыл», «Қазақстан тіл туралы заңының қабылданғанына — 20 жыл» жыр мүшайрасының жеңімпазы.

Рухани жүздесуде сөз алған Алматы облысының мәдениет, архивтер және құжаттама басқармасының басшысы Марлен Көлбаев Айтақын Мұхамедиұлын  мерейлі жасымен  құттықтап, ізгі тілегін жеткізді. Сондай-ақ, иығына шапан жауып, сый-құрмет көрсетті. Осыдан соң  ақынның үзеңгілестері жастарға кеш иесінің жалпы шығармашылығы, айтыс аламанындағы дара дарыны мен  асыл қасиеттері туралы әңгімелеп берді. Сөз  кезегінде айтыскер ақын жиналған қауымға өз өлеңдерін оқып, айтыс және өрелі өнер жайында жастардың қойған түрлі сауалдарына жауап берді. Сонымен бірге кешке қатысушы шаһардағы  Қ.Байсейітов атындағы саз колледжінің студенті Нұрсапа Ұлықпан мен Нұрдана Сәлімхан сөз сайыстырып,  көрерменге қыз бен жігіт айтысының тамаша үлгісін сыйлады.

 

Бөлісу
Share on FacebookTweet about this on TwitterEmail this to someoneShare on VK