Мемлекет басшысы Қасым-Жомарт Тоқаевтың тапсырмасымен «Abai ulttyq mektebi» алғашқы ұлттық мектебінің құрылысы басталды. Бұл жоба Қазақстанның талантты балалары үшін бірегей білім беру ортасын құруға бағытталған, деп хабарлайды KAZ.NUR.KZ Оқу-ағарту министрлігінің ресми сайтына сілтеме жасап. Министрліктің баспасөз қызметінің хабарлауынша, Алматыға жұмыс сапары барысында оқу-ағарту министрі Ғани Бейсембаев мектеп құрылысымен танысты. Мектеп 900 оқушыға арналған және мұнда балаларға арналған интернат, оқытушылар үйі, кітапхана, спорт кешені қарастырылған. Ол биыл ашылады деп жоспарланып отыр.
Жаңа білім беру ұйымының концепциясы Абай философиясына, оның ішінде «бес асыл іс» идеясына негізделген. «Abai ulttyq mektebi»-нің құрылуы – отандық білім беруді дамытудағы ең маңызды стратегиялық қадамдардың бірі, ол өзінің шыққан тегін жақсы білетін, бірнеше тілді меңгерген және жаһандық сын-қатерлерге төтеп бере алатын зиялылардың жаңа буынын тәрбиелеуге бағытталады», — деп атап өтті министр. Ведомствоның баспасөз қызметінің мәліметіне сүйенсек, жобаны жүзеге асырудағы маңызды қадам — «ABAY-Programme» біртұтас білім беру бағдарламасының әзірленуі. Ол көптілді, зиялы және ұлттық сипаттағы тұлғаны қалыптастыруға негізделген. Мектеп сондай-ақ еліміздің жетекші педагогикалық жоғары оқу орны – Абай атындағы қазақ ұлттық педагогикалық университетімен серіктестік орнатады. Ынтымақтастық аясында «Абай зертханасы» құрылып, ол гуманитарлық білім саласындағы әдістемелік және ғылыми зерттеулер орталығына айналады деп жоспарланып отыр.
