Мерейлі отбасы жобасының жеңімпаздары
дереккөз

Отбасы —  береке-бірліктің қайнар көзі. Әрбір шаңырақтың бақыты — сәбилердің күлкісінде.  Биылғы «Мерейлі отбасы» ұлттық байқаудың облыстық кезеңіне аймақ бойынша  76 отбасы өтініш білдіріп, олардың ішінен 36-сы іріктелініп алынды.  Өнегелі отбасы мүшелерінің  мамандықтары да әртүрлі. Қарапайым еңбек адамдарынан бастап, көпбалалы отбасылар,  дәрігерлік, мұғалімдік жолды  ұстанған жанұяларды да осы байқаудан табасыз. Облыс орталығындағы І.Жансүгіров атындағы Мәдениет сарайында  ұйымдастырылған салтанатты жиынға ақтық сынға жолдама алғандар жиналды.

Салтанатты жиынға Алматы облысы әкімінің орынбасары Ақан Әбдуәлиев  қатысып, «Мерейлі отбасы» байқауының аймақтық  кезеңінің жеңімпаздарын  марапаттады.

— «Мерейлі отбасы» ұлттық байқауының облыстық кезеңі қорытындыланды. Өңірде жалпыхалықтық сипат алған сайысқа қатысушылар саны артып келеді. Олардың бәрі – өсіп-өнген, елге танымал, берекелі шаңырақ иелері. Арасында қарапайым еңбек адамдарынан бастап түрлі мамандық иелері, өңірдің өнер жұлдыздары да бар. Жеңімпаздарды анықтау кезінде олардың қоғамға қосқан үлесі, көрсеткен үлгі-өнегесі, жеткен жетістіктеріне   назар аударылды.  Жеңістеріңіз құтты болсын! Әр отбасы мүшелеріне денсаулық, жанұяларыңызға бақыт, ұзақ ғұмыр тілеймін,-» деді облыс әкімінің орынбасары.

Мерейлі отбасы жеңімпаздары
дереккөз

Балқаш  ауданынан Қыстаубаевтар және Кербұлақ ауданынан Ақбасовтар отбастары  жеңімпаз атанып, оларға  бірінші дәрежелі диплом мен 1 млн.теңгенің сертификаты табысталды.

Әбдіжаппар Қыстаубаев 1999 жылы өз ауылында  «Бірлік» ұжымдық шаруашылықты  құрып,  өзі басшылықта. Қазір мұнда 330-дей адам еңбек етеді. Ескі қонақ үй ғимаратын  жөндеп, оны  жаттығу залы ретінде  ашып, пайдалануға демеушілік жасаған. Қандас бауырларымызды туған елге көшіріп әкеп, 50 отбасын баспанамен және тұрақты жұмыспен қамтыған. Көпбалалы 7 отбасына тұрғын үй кілтін табыстаған. Өз шаңырағында жұбайы екеуі 3 ұл, бір қыздан 10 немере сүйіп отыр.

Ал Ақбасов Баясыл Ерасылұлы да ауыл шаруашылық өндірістік кооперативін басқарады.  Жыл сайын көп балалы және тұрмысы төмен отбасыларға көмектесіп, баспанамен қамтиды. «Қуанса, бала қуансын» деген қағидамен 2 жыл көлемінде балалар мерекесінде балдырғандарға 1 млн. 800 мың теңгеге сыйлық табыстады.

 40 жылдай  мектепте ұстаздық еткен Ғалия Ниязқызы 2019 жылы ақпанда Елбасы Нұрсұлтан Назарбаевтың қатысуымен өткен «Нұр Отан» партиясының съезінде көп балалы аналар атынан сөз сөйледі. Сол жиындағы баяндамасы негізінде республика  бойынша  5 наурыз «Аналар кеңесі күні» деп белгіленді. Бүгінде 3ұл, 2 қызды тәрбиелеген отбасында 11 немере өсіп келеді.  Облыстық байқауда жеңімпаз атанған отбасылардың атынан Ғалия Ақбасова сөз алып,  ықылас-ниетін білдірді.

Бұл жеңімпаз атанған Ақбасовтар мен Қыстаубаевтар отбасы Астана қаласында өтетін республикалық кезеңге қатысуға мүмкіндік алды. Баршамыз облысымыздан озып шыққан мерейлі отбасыларға дауыс беру арқылы қолдау көрсетуіміз керек.

Ал екінші орынға жамбылдық Сембиевтер, ескелділік Қасеновтар, Алакөл ауданынан Зуевтар отбасы лайық деп танылды. Үшінші орынды Әлімбеков –Еңбекшіқазақ, Әлдибеков – Кеген, Күшбаев – Талғар аудандарының өнегелі отбасылары иеленіп, жеңімпаздар  облыс әкімінің дипломы мен қаржылай сертикаттарын иеленді. Байқауға қатысқан отбасылардың  арасында  ынталандыру сыйлықтарын иеленген отбасылар  да бар.

Бөлісу
Share on FacebookTweet about this on TwitterEmail this to someoneShare on VK