дереккөз

Алматы облысының орталығы   Талдықорған қаласында Ұлы Жеңістің 74 жылдығы сән-салтанатпен тойланды. Екінші дүниежүзілік соғыстың бар ауыртпалығын  көтеріп, Отан үшін от кешіп, соғыстың қанға бөккен даласында қайсарлықпен шайқасқан, Жеңістің туын желбіреткен соғысы ардагерлері үшін ерекше мейрам. Қазіргі таңда Талдықорған қаласында 17 соғыс ардагері бар. Орталық мәдениет және демалыс саябағындағы «Даңқ» обелискісіне гүл шоқтары қойылып,   жиналғандар бір  минут үнсіздікпен құрбан болған ерлерді еске алды.

Салтанатты шара «Жастар» саябағында әскери –патриоттық клубтардың көрмесімен жалғасты.  «Ұрпақтар ұмытпайтын – Ұлы Жеңіс» атты театрландырған көрініске майдан шебіндегі ерлік пен тылдағы еңбек арқау  болды.  Соғыста қаза тапқан ардагерлердің  ұрпақтары  да қолдарына аталарының  порттерін алып шығып  ерліктеріне тағзым етті.

 

 

дереккөз

Жеңіс туын желбіреткен  соғыс және тыл ардагерлерін  және  жиналған жұртшылықты  Алматы облысының әкімі Амандық  Баталов құттықтады.

«Құрметті соғыс ардагерлері! Ел басына күн туған шақта қолдарыңызға қару алып, жауға қарсы тұрдыңыздар.  Ұрпақтарыңызға бейбіт өмір сыйлаңыздар!  Бүгін Жеңістің  74 жылдығы тойлануда. Өлім мен өмір арпалысқан шақта көзсіз ерлік, батылдық таныттыңыздар.  Сұрапыл соғысқа Жетісу жерінен 120  мың адам аттанып, оның тең жарымы ұрыс даласында қаза тапты.  28- панфиловшылар біздің жерлестеріміз. Қаһарман ерлердің рухына құрметпен бас иеміз.  Жеңіс туын желбіретуде қан кешіп, кеудесін оққа тосқан  соғыс ардагерлеріне жан-жақты көмек көрсетіліп келеді. Мерекеге  орай бір жолғы төлем берілді. Өткенге салауат  айтып, баршаңызға ынтымақ, татулық тілеймін. Еліміз гүлдене берсін!»,- деді облыс басшысы А. Баталов.

Мерекеде  Отан соғысы ардагерлері дала асханасынан дәм татты.  Қазақстан Республикасының Еңбек сіңірген әртісі Досымжан Таңатаров, Сүйінбай атындағы облыстық филармония мен «Талдықорған әуендері» фольклорлық -этнографиялық ансамблі әншілері  әсем әндерді  тарту етті.

Талдықорған төріндегі    мереке  жастарға арналған шарамен жалғасып,  көгілдір от шашумен  аяқталды.

Бөлісу
Share on FacebookTweet about this on TwitterEmail this to someoneShare on VK