Жетісу облысында бейімделген мектептің орнына тағы бір жаңа мектеп салынды. Ақсу ауданы Көшкентал ауылында 75 орынды шағын орталығы бар 180 оқушыға арналған мектеп ашылды.
Жаңа үш қабатты мектепте 18 орынды оқу залы бар кітапхана, 40 орынды асхана, 124 орынды спорт және акт залдары қарастырылған. Білім ошағында жаңа модификация кабинеттері — физика, химия, биология кабинеттері, екі мультимедиялық кабинет, сондай-ақ қыздар мен ұлдарға арналған, барлық қажетті құралдармен жабдықталған шеберханалар бар.
Атап өтсек, Көшкенталдағы жаңа мектепте 38 педагог жұмыс істейді. Бұл ретте мектепке 175 бала, ал шағын орталыққа 50 бала қабылданды. Жалпы биыл өңірде 2700 орынды 4 жаңа мектеп іске қосылды.
Еске салсақ, Жетісу облысында Президенттің тапсырмаларын орындау мақсатында әлеуметтік инфрақұрылымның жай-күйін жақсартуға ерекше көңіл бөлінеді. Атап айтқанда, облыс құрылған сәттен бастап жөндеу мен жаңа құрылыс нәтижесінде әлеуметтік нысандарды жаңарту 50% құрады.
Жетісу облысы әкімінің баспасөз қызметі
