Талдықорғанда аралас жекпе-жек түрінен (ММА) «Алаш Прайд» промо-лигасының халықаралық турнирі өтті. «Орбұлақ» шайқасының 375 жылдығына орай ұйымдастырылған додаға 24 спортшы қатысты, — деп хабарлайды taldykorgan-online.kz

«Жастар» спорт кешенінде өткен жарыс тартысты өрбіді. Сайысқа келген саңлақтар шаршы алаңда атой салып, үздік өнер көрсетуге тырысып бақты.

Ортаға алдымен 66,1 келі салмақтағы файтерлер шықты. Бұл кездесуде отандасымыз Бақытжан Жұманов пен ташкенттік Валишер Рахматов өзара мықтыны анықтады. Үш раундтың қорытындысы бойынша жеңіс өзбек спортшысының пайдасына шешілді. 56,7 келі салмақта бақ сынаған (Тараз) Мұқағали Несіпбай тәжік спортшысы Хуршед Назаровпен кездесіп, ұпай саны бойынша тең түсті. Осыдан кейін (66,1 келі) қырғызстандық Азиз Сатыбалдиев пен өзбек файтері Уайс Тлегенов жарыс алаңына шықты. Екінші раундта Азиз қарсыласын накаутпен ұтып кетті.

Көрермендердің делебесін қоздырған сайысты Шешенстаннан келген Сайд – Селим Матаев пен алматылық Таксим Забитов жалғастырды. 66,1 келі салмақта бақ сынаған спортшылардың жекпе-жегі тартысты өтті. Үшінші раундта отандасымыз қарсыласына ауырту әдісін қолданып, жеңіске жетті. Ал, 61 келі салмақта (Тәжікстан) Мерхрод Умаров пен Қазақстан атынан Рауан Бекболат кездесіп, төрешілердің шешімімен екеуі тең түсті.

Сондай-ақ, 66 келіде (Бішкек) Құштарбек Әмірбекұлы мен талдықорғандық Денис Муцнек шыққан болатын. Үш раундқа созылған бәсекеде ұпай санымен қырғыз спортшысы жеңіске жетті. Келесі де шарашы алаңға 81 келідегі спортшылар шықты. Мұнда ресейлік Иван Салогоров пен отандасымыз Ғалымжан Қанаев жұдырық түйістірген еді. Қарсыласын соққының астына алған шымкенттік файтер бірінші раундта накаутпен жеңіске жетті. Сонымен қатар, 56,7 келі салмақта қазақстандық Бахтияр Несіпбек Өзбекстаннан келген Холдмурод Нормуратовпен шығып, жеңісті жұлып алды. Бұл кездесуде отандасымыз екінші раундта қарсыласына ауырту әдісін қолданған болатын.

77 келідегі файтерлердің де жекпе-жегі тартысты өрбіді. Бұл сында Душанбе қаласынан келеген Ифтихор Арбобов қазақстандық Артем Резниковтан ұтылып қалды. Отандасымыз төрешілердің берген бағасымен үшінші раундта жеңіске жетті. Осыдан кейінгі сайыс қырғыз елінің саңлағы (66 келі) Жәнібек Қаныбекұлы мен алматылық Жұман Жұмабеков (61 келі) арасында өрбіді. Айта кету керек, бұл жекпе-жек қазақстандық файтер үшін сәтсіз басталды. Төбелес барысында қолын сындырып алған отандасымыз екінші раундтың ортасында жарысты аяқтауға мәжбүр болды. Жеңіс қырғыздың еншісінде.

Ал, 93 келі салмақта өнер көрсеткен саңлақтардың жекпе-жегі жанкүйерлердің айызын қандырды. Ресей елінен келген Константин Андрейцевке алматылық Асылжан Бақытжанұлы есе жібермеді. Үшінші раундтың қорытындысы бойынша қазақ спортшысы жеңіске жетті.

Көпшілік тағатсыздана күткен айтулы доданың басты жекпе-жегі дағыстандық Абдулмуталип Гайирбеков пен Тараз қаласынан келген Ермек Тлауов арасында өтті.

66 келіде шеберлік байқасқан файтерлердің кездесуі үш раундқа созылды. Бұл сында төрешілердің берген бағасы бойынша Абдулмуталип жарыс жеңімпазы атанды.

Бөлісу
Share on FacebookTweet about this on TwitterEmail this to someoneShare on VK