Облыстық драма театрдың жаңа ғимаратында өткен салтанатты шараға Алматы облысының әкімі Амандық Баталов қатысып, жүлдегер атанған журналистерді марапаттады, — деп хабарлайды taldykorgan-online.kz

Жыл соңына қарай арнайы өткізіліп жатқан бұл салтанатты жиын –журналистика саласына деген қолдаудың молдығын білдіреді.
Салтанатты жиында Алматы облысының әкімі Амандық Баталов сөз алып, жиналған қауымды алда келе жатқан Тәуелсіздік күнімен құттықтады. Қазақ елінің айбыны асқақ, мерейі үстем болсын деген өңір басшысы артынша, журналистерге деген өзінің ыстық ықыласын білдірді.

– Журналистер қауымы – жаңалыққа жаны жақын, жақсы істердің жаршысы, қоғам өмірінің барометрі. Халық пен билік арасындағы алтын көпір десек те, артық айтқандық емес. Елдің жағдайын, ой-пікірін, тілегін жеткізетін – журналистердің атқаратын жүгі жеңіл емес екені белгілі, — деп атап өтті.

Сонымен қатар, Амандық Ғаббасұлы жақында ғана жарияланған Елбасының «Ұлы Даланың жеті қыры» атты мақаласы баспасөз беттерінде жарияланып, тілшілердің арқасында халыққа насихатталып жатқандығын айтты.

«Алдағы уақытта ауқымды істерді атқаруда – бұл мақаланың бізге – бағдар болары сөзсіз. Сіздер ел игілігі жолында, соның ішінде ақпарат саласында абыроймен қызмет атқарып келесіздер. Сол үшін Сіздерге үлкен алғысымды білдіремін!», — деді А.Баталов.

Облыс әкімінің сөзіне сүйенсек, биыл бұқаралық ақпарат құралдары саласында мақтан тұтарлық жағдайлар мол. Атап айтқанда, олыстық «Жетісу» мен «Огни Алатау» газеттері 100 жылдық мерейтойын атап өтті. Одан бөлек, «Жетісу» газеті «Үркер» ұлттық байқауында «Өңірлік үздік басылым» аталымы бойынша жеңімпаз атанса, «Жетісу» телеарнасы «Тұмар» телевизиялық байқауында «Үздік өңірлік телеарна» номинациясы бойынша топ жарған. Сондай-ақ, қос басылымның 6 қызметкері Қазақстан Республикасы Ақпарат және коммуникация министрлігінің «Ақпарат саласының үздігі» төсбелгісімен марапатталды.

Өңір басшысы журналистикамен қатар әдебиетке үлес қосып жүрген қаламгерлерді де атап өтті. Олардың қатарында «Талдықорған» газетінің тілшісі Айдын Кәлімхан мен «Жетісу» телеарнасының бөлім редакторы Есболат Айдабосын бар. Олар «Алтын қалам» тәуелсіз әдеби жүлдесінде бас жүлденің иегері атанған. Және «Қазақстан» телеарнасының Алматы облысы бойынша меншікті тілшісі Қуаныш Серікханов Қазақстан халқы Ассамблеясының «Шаңырақ» байқауында 1-ші орын алды. Сондай-ақ, облыстық қос газеттің 100 жылдық мерейтойына орай, 6 қызметкерге пәтер берілген.

«Бұқаралық ақпарат құралдары өкілдерінің шыққан биігі, еңбегінің жемісі деп, біз осындай жақсылықтарымызды айта аламыз. Құрметті журналистер! Ақпарат саласында елге адал қызмет етіп, абырой биігінен көріне беріңіздер! Сіздерге тек қана шығармашылық табыс тілеймін. Марапаттарыңыз құтты болсын!», — деді А.Баталов.

Байқауға республикалық, облыстық, аудандық, қалалық бұқаралық ақпарат құралдары қызметкерлері және штаттан тыс тілшілерден, жалпы 143 үміткердің жұмыстары қабылданған.

Осымен екінші мәрте ұйымдастырылған байқаудың жүлде қоры да қомақты. Өткен жылы аталмыш додаға 7 млн. теңге көлемінде қаржы бөлініп, жеті аталым бойынша 21 адам жеңімпаз атанған еді. Ал, биыл тағы төрт номинация қосылып, жүлде қоры 8 млн. теңгеден асқан.

Байқауға қатысқан журналистер «7-20-25», «Нұрлы Жол» «Цифрлы Қазақстан», «Рухани жаңғыру» бағдарламалары, Астана қаласының 20 жылдығы және Алматы облысының әлеуметтік-экономикалық дамуы тақырыбы бойынша сынға түсті.

Байқау комиссиясы қарауына ұсынылған материалдар төмендегі номинация талаптарына сәйкес іріктеліп, үміткерлердің жұмыс істеу тәжірибесі, материалдың маңыздылығы, мазмұндылығы, оны ұсыну тәсілі назарға алынды.

Айта кетейік, бұл байқауда әріптестеріміз «Талдықорған» газетінің қызметкерлері де жүлдегерлер қатарынан көрінді. Яғни, «Баспа басылымның үздік дизайны, инфографика» аталымы бойынша дизайнер Айжан Садуакасова 3-ші орын алса, Зарина Чечетова 1-ші орынды иеленді.

Ал, «Талдықорған» газетінің бас редакоры Данияр Сейсенбаев (Taldykorgan-online.kz сайтының редакторы) «Үздік желілік басылым» номинация бойынша 2-ші орынды ұтып алды.

Байқау қорытындысының нәтижесі:

«Баспа басылымның үздік дизайны, инфографика» аталымы бойынша:
3-орын Садуакасова Айжан — «Талдықорған» және «Талдықораған ақшамы» газеттерінің дизайнері марапатталады.
2-орын Мураталинова Молдір – облыстық «Жетісу» газетінің дизайнері марапатталады.
1-орын Чечетова Зарина — «Талдықорған» газетінің дизайнері

«Үздік бейне клип өндеуші (монтаж) номинация бойынша:
3-орын Белов Александр — облыстық «Жетісу» телеарнасының дизайнері
2-орын Токимтаев Данияр — облыстық «Жетісу» телеарнасының видеоинженері.
1-орын Мустафаев Данияр – облыстық «Жетісу» телеарнасының режиссері

«Үздік облыстық Vlog (Алматы облысы бойынша бейне-блог) немесе (Үздік блогер») (Алматы облысы туралы пост) номинация бойынша:
3-орын Қабышева Самал – «Казинформ» сайтында шыққан «Алматы облысындағы айдынды Алакөлде соңғы төрт жылда туризмді дамытуға бағытталған жұмыстар қарқын алды» мақаласы үшін,
2-орын Әнербай Мәулен — әлеуметтік желілерде «Туған жер бағдарламасы» аясында жазбалары үшін,
1-орын Қажет Андас – «Atameken Business Channel» сайтта шыққан «Қаусаған қабырға, шайқалған шаңырақ мақаласы үшін

«Үздік желілік басылым» номинация бойынша:
3-орын Қуаныш ТҰНҒАТАР — облыстық «Жетісу» газеті сайтының редакторы
2-орын Сейсенбаев Данияр — Taldykorgan-online.kz сайтының редакторы
1-орын Абылаев Талғат — TINFO (Талдыкорган Инфо) сайтының жетекшісі

«Үздік тілші» (аудан, қалалық баспа басылымдары) номинация бойынша:
3-орын Сартбаев Думан — Ұйғыр ауданының «Қарадала тынысы – Қарадала нәпәси» газетінің тілшісі «Тарихтан сыр шертер тас мүсін» мақаласы үшін
2-орын Оңалбаева Ляйля – Кербұлақ ауданы «Кербұлақ жұлдызы» газетінің редакторы «Жеңісті күндер көп болсын!» мақаласы үшін.

1-орын Нүсіпова Алима – Ескелді ауданының «Жетісу шұғыласы» газетінің тілшісі «Күнге бет алған керуен» мақаласы үшін

«Үздік фотосуретші» номинациясы бойынша:
3-орын Ерофеев Дмитрий – «Огни Алатау» газетінің фототілшісі «Астанаға Жетісудың тартуы» фотогалереясы үшін
2-орын Жумабай Мусабек — «Жетісу» газетінің фототілшісі
1-орын Ысқабай Женіс — «Рухани жаңғыру» фотогалереясы үшін

«Үздік оператор» (бейнематериал) аталымы бойынша:
3-орын Оразалинов Самат – «Қазақстан» телеарнасындағы «Жетісулық ағайын ұлыстың ұлы күнін атап өтті» сюжеті үшін
2-орын Камзин Надир — «Жетісу» телеарнасының операторы «Астанаға 20 жыл» сюжеті үшін
1-орын Байбосынов Олжас – «Хабар 24» телеарнасының операторы «Международная экспедиция «Мұқали» в рамках программы «Рухани жаңғыру» сюжеті үшін

«Үздік журналист» (ақпараттық мақала) аталымы бойынша:

3-орын Молдағалиева Меруерт – облыстық «Жетісу» газетінде жарияланған «Өндіріс пен өнеркәсіп қашан қазақшаланады?» ақпараты үшін
2-орын Тұнғатар Құаныш – облыстық «Миллиардты мойындатқан Мұқали» мақаласы үшін
1-орын Оқбаева Айгүл — қалалық «Талдықорған» газетінде жарияланған «Үнсіздік әлемі» мақаласы үшін

«Үздік тележурналист» (жаңалық сюжет) номинациясы бойынша:

3-орын Исаева Жазира — облыстық «Жетісу» телеарнасында шыққан «Рухани жаңғыру» бағдарламасы аясында батыс өлкенің киелі жерлеріне ұйымдастырылған блог- турдың сюжеті үшін

2-орын Аязбаева Назгүл — облыстық «Жетісу» телеарнасының редакторы «Ауыл ахуалы» репортажы үшін
1-орын – Жантасова Гульнар – «Хабар» агенттігінің тілшісі «Цифровизация сферы туризма в рамках реализации программы «Рухани жаңғыру» сюжеті үшін

«Үздік республикалық (халықаралық) тілшісі Алматы облысы туралы ақпараттық материал) аталымы бойынша:
3-орын Қалмаханбет Мұхаметқали — республикалық «Егемен Қазақстан» газетінде шыққан «Жер жаннаты Жетісу» мақаласы үшін
2-орын Қабышева Самал — республикалық «31 телеарнада» шыққан «Ақсу қант зауытының жұмысы жанданды» репортажы үшін

1-орын Малеев Серік — республикалық «Литер» газетінде шыққан «Текели: вчера, сегодня и всегда» мақаласы үшін марапатталды.

Сондай-ақ, облыстық журналистика саласында 60 жыл көлемінде еңбек еткен (ардагер журналист) Әли Ысқабайға да лайықты құрмет көрсетілді.

Бөлісу
Share on FacebookTweet about this on TwitterEmail this to someoneShare on VK