Күреңбел өңіріндегі Шоқан Уәлиханов атындағы «Алтынемел» мемлекеттік мемориалды музейі – өңірдегі мәдени-туристік нысанның бірі. Мемлекет басшысының Жетісу облысына келген сапарында берген тапсырмасына сай музей өткен жылы қайта жаңғыртудан өткізіліп, жаңа кейіпке енді. Музейде 1130 экспонат қойылған. Соның ішінде ғалымның өзі тұтынған заттар да бар.
Бұған дейін де «Алтынемел» мемориалды музейі көпшілікке таныс болғанмен, қайта жаңғыртудан өткеннен кейін мұнда келушілер қатары арта түскен.
— Республикадан арнайы қаржы бөлініп, өткен жылы музей ғимараты күрделі жөндеуден өтті, экспозициясы заман талабына сай қайта безендірілді. Музейге лэд экран, ақпараттық дүңгіршек, диорамадағы фондық әуенді сүйемелдеу құрылғысы орнатылды. Біздің музейге шетелден де келіп жатады, соның ішінде Швеция, Жапония, Ресей ғалымдары мен журналистері де бар. Әсіресе, қайта жаңғыртудан өткеннен кейін халықтың музейге деген қызығушылығы арта түсті, — дейді музей директоры Марал Рахатова.
Музейге келушілер Шоқанның өскен ортасы, өмір жолы, зерттеу сапарлары, ғылыми еңбектері, ағартушылық идеялары жайлы кең мағлұмат ала алады. Сол сияқты Шоқанның өзі пайдаланған заттарды да көре алады. Мұнда ғалымның Қашқария сапарына алып барған тапаншасы мен сол жақтан тағып келген парша белбеуі, мыс табақ, қасық, бұрыш ұнтақтағыш сияқты тұрмыстық заттары бар. Ш. Уәлихановтың жүріп өткен жолдарды бейнелеген, 250 кг қой жүнінен жасалған гобелен кілем музейге кіргеннен көз тартады. Сондай-ақ Шоқанның қазақ даласына Ресейден арнайы алғызып оқыған «Современник» журналын да музей жәдігерлерінің арасынан көруге болады. Ғалымның зиратының басына генералдар Кауфман мен Калпаковский қойған құлпытастың түпнұсқасы қазір музейдің ішінде тұр, ал көшірмесі жерленген орнына қойылған.
Шоқан Уәлиханов атындағы «Алтынемел» мемориалды музейіне өткен жылдың қараша айынан бері 2100 адам келген.
Жетісу облысы әкімінің баспасөз қызметі.
