Идеологиялық тұрғыда ескірген жер-су атауларын ауыстыру керек – Дос Көшім

643

«Ленин, Сталин, Октябрь секілді идеолгиялық тұрғыда ескірген атаулар ауысуы керек. Бұл жұмыстар бүгінде Алматыда жақсы жүріп жатыр. Ал, орыстанып кеткен солтүстік аймақтарда әлі де түсіндіру жұмыстарын жүргізіп, мәселені заңмен реттеу керек. Себебі, біздің заңда жергілікті халықтың пікірі ескерілсін деген сөз бар. Ол үшін ақпараттандыру жұмыстарын нығайту керек». Бұл туралы Taldykorgan-online.kz cайтының тілішісіне берген сұхбатында белгілі саясаттанушы Дос Көшім мәлімдеді.

«Жер-су аттарына байланысты тағы бір мәселе бар. Бүгінде қазақтың біраз жері бұрынғы қалмақ, жоңғар батырларының есімімен аталады. Мәселен: Шонжы, Қордай, Мұқыры, Қаскелең және т.б. Кезінде дұшпанға сес болсын деп бабаларымыз ол жерлерді «Шонжының басы алынған жер», «Қордай өлтірілген жер» деп атаған. Міне сол жерлерді ендігі кезде өз батырларымыздың есімдерімен атасақ дұрыс болады деп ойлаймын. Тарихтан белгілі Шонжының басын алған Әлмерек батыр. Таяуда батыр атындағы қор мен Ұйғыр ауданы әкімдігі бірігіп, батыр бабаларымызды насихаттау мақсатында үлкен жиын өткізді. Бұл – ақпараттандыру жұмыстарының басы. Сол жиында Ш.Уәлиханов атындағы тарих және этнология институты директорының орынбасары Әуезхан Шашаев Шонжыға Әлмерек батыр есімін беру мәселесін көтеріп, ұсыныс тастады. Енді халық қолдап, өз тараптарынан ұсыныс жасаса, атауларды ауыстыруға бір табан жақындай түсеміз. Әрі бұл бастаманы бүгінгі билік те қолдайды деп ойлаймын» дейді Дос Көшім.

Сондай-ақ, саясаттанушы соңғы кездері халық белсенділігінің арта түскенін атап өтті. «Өз тарихымызды таниық, тереңдетейік, жақсыларын жаңғыртайық деген ел тарапынан үлкен талпыныс бар. Сөзсіз, бұл жерде Елбасының «Рухани жаңғыру» бағдарламалық мақаласының көмегі болып жатыр. Бірақ, бұл «Рухни жаңғыру» боламаса, халық үнсіз қалады деген сөз емес. Тәуелсіздік алып, еңсемізді тіктеп, етек-жеңімізді жиған соң халық өткеніне өзі үңіле бастады. Сонан соң Президент «Рухани жаңғыруды» жазды. Оны жаздырған халықтың сұранысы. Оған дейін ештеме болмады деген қате түсінік. Жер-су атауларын ауыстыру жөніндегі бастама да жергілікті халықтан шығуы керек. Ата заңымызда «Биліктің қайнар көзі – халық» деп жазылған ғой. Біз, «Анау жасалмай жатыр», «Мынау атқарлмай қалды» деп билікке ренжіп жатамыз. Сол шаруаны өзіміз ел болып бастап кетсек, қанекей?!» деді саясаттанушы.

Бөлісу
Share on FacebookTweet about this on TwitterEmail this to someoneShare on VK