Қыстың ызғарынан қатып қалған тастардан бу бұрқырап, жылғадан аққан су жылтырап көктем де келді. Баршамызға белгілі жылылық пен шаттықты өзімен бірге ала келетін бұл мезгіл мерекеге толы. Ал, солардың ішіндегі ең ерекшесі һәм мәртебесі жоғарысы — Ұлыстың ұлы күні. Яғни, бұл мейрам бәрінен биік. Биіктігі сол, қазаққа қуаныш пен күлкі сыйлар жаңа бір жылдың басталуы. Тоғыз жолдың торабы тоғысып, күн мен түннің теңелетін уақытында танысқан жұрт табысып, ренжіскендер арадағы өкпені ұмытып қауышып жатады.

Жер үсті жасарып, жаңғырып, бар аймақ сән құратын той жайын тарихтан алып қарасақ, қазақ қазақ болып қалыптасқалы  қуанышты күн елеусіз қалған емес. Иә, бұл сөзімізге тұздық, дерегімізге дәйекті дәлел болатын жайттар. Бабаларымыздың тасқа қашап жазған деректеріне сүйенсек, ұлтымыздың ең ұлы мерекесі болып саналатын Наурыздың тарихы сонау алыста жатыр. Бұрындары ата – бабаларымыз қой қоздап, қозы өріп, көк шыққанның өзін биік шаттыққа балап, халқымыздың салт-дәстүрін кеңінен дәріптеген. Кейіннен Наурыз заңды күшіне еніп, мемлекеттік мереке болып белгіленді. Егемендігімізді алғалы бері құшағында осындай шуағы бар мереке, Алаштың ғажаптығын өзгелерге куә қылып келеді.

Дереккөз

Ал, қазіргі таңда береке мен бірліктің бастауы болған осы мереке қандай деңгейде тойланып келеді? Барша жұрттың астауы асқа толып, қуаныштар еселеніп, жеті түрлі қасиетті дәмнің дайындалатынын білеміз. Ақ батамен басталған мерекеде ән шырқалып, күй төгіліп қолдан келгенше өзімізге шаттықпен нұр себуге тырысып жатамыз. Алайда, қазіргі балалар бұрынғы жастар секілді бұл күннің маңыздылығын сезініп, ойнап-күліп жүгіріп, қуанышты кереметтей жыр қып жүр ме? Жарайды, балаларды қоялық үлкендердің өзі мейірім мен адалдықтың, адамдықтың артатын күннің құнын түсіріп алмады ма? Міне, бізді осы сауалдар мазалайды… Жанның жарасын емдеп, шыңдардың мұзын еріткен, көктемнің сызы жүзімізге жылылық сыйлағанымен тіршіліктің соқпағымен қарапайым көзқарас танытатын секілді-міз.

Бірақ, төл мерекеміздің деңгейі жылдан жылға көтеріліп келе жатқанын жоққа шығаруға болмайды. Барынша дайындалып, дәстүрімізді дәріптеп бағудамыз. Дегенмен, мерекеге санаулы күндер қалғанда ғана қоржынымызды дайындап, сандықта жатқан қазақы шапанымызды іздеп, киіз үйді құрастыруға кірісіп кететініміз жасырын емес. Бұдан өзге наурыз десе бірден есімізге түсетіні ас мәзірі. Неге біріншіден ішіп-жеу мәселесін ғана ойлаймыз? Айта кету керек, ұлттық ойындарымыздың да ұлықталатын күні осы уақыт.

Дереккөз

Алтыбақан теуіп, асық ойнау да Наурыз келгенде есімізге түсіп жатады. Міне, мереке басталмақ деген сәтте ойын құралдарын құрып, кейіннен мейрам өте салысымен орнын ойсыратып қоямыз. Тарихтан бері белгілі салт-дәстүрімізді  барлық уақытта ұлықтауымыз керек емес пе?! Мойындау керек орыстардан бізге жеткен қаңтар айының басында тойланатын жаңа жылдың мәртебесі әлі де болсын жоғары. Бұл мейрамға бір ай бұрын ерте қамданатынымыз сол, жарқылдаған түрлі безендірулерді жаңбырдан кейін шыққан саңырауқұлақтай қаптатып қоямыз. Қалың жұртшылық көп жүретін жерлерде шырша тұрғызып, оны ұзатылатын қыздай қылып сәндеп қоятынымыз және бар. Одан бөлек «Аяз атадан саған базарлық» деп кішкентай балаларымызды алдап жатамыз. Нәтижесіне келгенде балалардың сол жаңа жылға деген қызығушылығы арта түседі. Неге өзіміздің төл мерекемізді яғни, Ұлыстың ұлы күні болған жаңа жыл бастауын осындай жоғары деңгейде қызығушылықпен атап өтпеске. Бүгінгі жас ұрпақ, ертеңгі болашағымыз. Сондықтан сыйлық жасасақ осы уақытта балаларымызды қуантайық. Сонда ғана балаларымыз төл мерекеміздің исін сезіп, келесі жылда өздігінен Наурызды асыға күтетін болады. Мейрамға деген көзқарасы жоғарылайды.

Дереккөз

Бұл мәселе баспасөз беттерінде үнемі көтеріліп, жазылып келеді, жауыр болған тақырып деуімізге болады. Дегенмен, нәтиженің төмендігін ескеріп, айтпасқа болмас. Иә, қазіргі таңда ұлы күннің басты ерекшелігіне мән бермей, бірқалыпты бағамдай алмай жатқан секілдіміз. Қайырымдылық пен мейірімділіктің айында қамқорлық жасап, өзгелерге көбірек жылылық сыйлауымыз керек сияқты. Мейірімге шөлдеген жандарға пейіліміз арқылы ізгі тілегімізді жеткізіп, жылы жүрегімізді білдірсек мерекенің де маңызы арта түседі емес пе?! Айтпағымыз сол Наурыз мейрамының мәнін кеңінен түсініп, ұлттық құндылықтарымыз бен салт-дәстүрлеріміздің дами түсуіне күш салайық. Мереке құтты болсын ағайын! Жаңа жылды жаңа жоспарлармен, жаңа қуанышпен қарсы алайық.

Бөлісу
Share on FacebookTweet about this on TwitterEmail this to someoneShare on VK