«Әділетті және Прогрессивті Қазақстанның Халықтық Конституциясы үшін!» облыстық коалиция мүшелері Асхат Базилов, Ләйлә Сембаева мен Қуаныш Сайлаубай Талдықорған қаласына қарасты Еркін ауылының №26 орта мектептің ұстаздары және оқушылардың ата-аналарымен кездесіп, елімізде жүзеге асқалы жатқан саяси үдеріс турасында диалог орнатты. Спикерлер Конституция – мемлекеттің негізгі тірегі екенін, ал енгізілген өзгерістер демократиялық үдерістерді жетілдіруге және қоғамдағы теңгерімді сақтауға бағытталғанын екшеп жеткізді.
Мінберге көтерілген коалиция мүшесі Асхат Базилов конституциялық реформалардың басты мақсаты – әділ әрі жауапты мемлекет қалыптастыру екенін атап өтті.
– Тәуелсіздік пен мемлекеттіліктің құндылығы да Конституцияда айқын көрініс тапқан. Жеріміздің тұтастығы, шекарамыздың беріктігі, ел бірлігі – мемлекеттің ең басты байлығы. Бұл қағидаттар тек саяси ұстаным емес, әр азаматтың жүрегіндегі қасиетті ұғым. Бірлігі бекем елдің іргесі сөгілмейді. Тәуелсіздік – бізге оңай келген жоқ. Сондықтан оны сақтау – әрқайсымыздың қасиетті парызымыз. Ата Заңымыз тәуелсіздігімізді баянды ететін құқықтық тірек, — деді Асхат Базилов.
Артынша сөз алған Ләйлә Сембаева жаңа жобаның саяси жаңғыру үдерісінің заңды жалғасы екенін айтып, Конституция жобасы ашық талқылаудан өткенін және қоғамнан түскен көптеген ұсыныстар ескерілгенін атап өтті.
