Мемлекетіміздің дамуына бағытталған бағыттар

463

Бүгін Парламенттің алтыншы сессиясында Қазақстан Республикасының Президенті кезекті Жолдауын халық назарына ұсынды. Алдымен, әлемді дүрліктіріп,әбігерге салған пандемияға қарсы күресте аянбай еңбек еткен барша қазақстандықтарға,оның ішінде дәрігерлерге, құқық қорғау органдарының қызметкерлеріне,әскери қызметшілерге, еріктілерге,кәсіпкерлерге және осындай кезде бір жағадан бас, бір жеңнен қол шығара қимылдаған барша азаматтарға шын жүректен алғысын білдірді.

Президент елімізде Стратегиялық жоспарлар мен реформалар агенттігі құрылатынын атап өтті.

«Пандемия мен дағдарыс кезеңінде мемлекеттік басқару жүйесі барынша жұмыс істеді. Дегенмен, жедел шешім қабылдау көп ресурсты қажет етеді. Сондықтан мен Стратегиялық жоспарлар мен реформалар агенттігін құру туралы шешім қабылдадым. Ол тікелей Президентке бағынады»,- деді.

Жолдауда негізгі ортақ міндеттерге тоқталды. Үкіметке мемлекеттік орган мен квазимемлекеттік секторды қысқарту жұмыстарын жеделдетуді тапсырды.

«Биыл оны 10 пайызға,келер жылы 15 пайызға қысқарту керек. 2021 жылы мемлекеттік органды 25 пайызға қысқарту жоспарын орындаймыз. Қорытынды бойынша және цифрландыру нәтижелеріне сәйкес,одан әрі қысқарту бойынша шешім қабылдаймыз. Қысқарту нәтижесінде мемлекеттік орган қызметкерлерінің жалақысын көтеруге мүмкіндік болады»- деді.

Сонымен қатар, жердің шетелдіктерге сатылмайтыны туралы айта келе, Үкімет ауылшаруашылығы жерлерін толыққанды экономикалық айналымға енгізудің өзге әдіс-тәсілдерін дайындауы тиіс екенін атап өтті. Үкіметке агроөнеркәсіпті дамыту бойынша жаңа ұлттық бағдарлама әзірлеуді де тапсырды.

«Біздің басты міндетіміз-халықты әлеуметтік маңызы бар азық-түлікпен қамтамасыз ету,еңбек өнімділігін 2,5 есеге арттыру және АӨК тауарының экспортын 2 есеге көбейту,миллиондаған ауылдық тұрғынның жалақысын көтеру»,-деді Қасым-Жомарт Кемелұлы.

Жыл соңына дейін өнеркәсіп саясаты туралы жаңа заң әзірленетінін,өнеркәсіпке қолдау көрсетудің нақты шараларын жетілдіру керектігі жайлы да айтты.Егемен еліміздің тұрақты дамуын қамтитын,барлық салаға тың серпін беретін нақты тапсырмаларға кеңінен тоқталып, дәрігерлер, мұғалімдер жалақысының өсуі, адамдардың өмір сүру сапасын одан әрі жақсарту, әлемнің озық үлгідегі стандарттарына сәйкестендіру қажеттігі туралы айтқан нақты ұсыныстарын талдықорғандықтар ерекше ден қоя тыңдады деп ойлаймын.

Азаматтар мүддесіне қызмет ететін мемлекеттің жаңа стандарттарын әзірлеу тұрғысынан құқық қорғау және сот жүйелеріне негізгі міндет артылатынын, аталмыш салаға реформаның аса қажеттігіне назар аударды. Қоғамдық кеңестердің ролін артыру мәселесі де кеңінен қамтылды.

«Қоғамдық кеңестердің құрамына түрлі әлеуметтік топ өкілдерін кеңінен тарту қажет. Мысалы, біз мүмкіндігі шектеулі адамдар осындай ұйымдардың жұмысына араласып, өз үндерін жеткізуі үшін қолайлы жағдай жасауымыз керек»,-деді.

Сонымен қатар, «Халық үніне құлақ асатын мемлекет» құрудың маңыздылығын, бұл,ең алдымен, билік пен қоғам арасындағы тұрақты диалог орнатудың кепілі екенін де атап өтті.

Еліміздің барша азаматтары, Президентіміздің Жолдауда көрсеткен мемлекеттің дамуына бағытталған бағыттарын барынша назарда ұстап,орындауға үлес қосады деп ойлаймын.

Әділет Рымтайұлы,
Талдықорған қалалық ішкі саясат бөлімінің басшысы.

Бөлісу
Share on FacebookTweet about this on TwitterEmail this to someoneShare on VK