Тұрғын үй — түйткілді мәселе

586
фото А.Нұршанов

Аудан, қала әкімдерінің ел алдындағы есептік кездесулері жалғасуда. Талдықорған қаласының әкімі Бағдат Қарасаев шаһардың  оңтүстік батысындағы 6-7 жаңа шағын аудан тұрғындарымен жүздесті. Оқушылар сарайында өткен басқосуда алдымен тауық жылының табыстары қорытындыланып, ағымдағы жылдың жоба-жоспарлары таныстырылды.

фото авторы А.Нұршанов

Қала басшысының айтуынша, өткен жылы Талдықорғандағы құрылыстарды салуға жалпы 33 млрд. 700 млн. теңге  қаражат бөлініп, толық игерілген. Бұл қаражатқа жаңадан салынған нысандардың басым көпшілігі аталған шағын аудандардың аумағына орналасқан. Мәселен, онда «Салтанат сарайы», «Көрме кешені» «Драма театр» сынды ірі нысандармен бірге көптеген көпқабатты тұрғын үйлер бой көтерген. Мұндай  жұмыстар биыл да жалағаса бермек.  Баяндамадан соң, әдеттегідей тұрғындар сауалына  құлақ түріліп, тиісті жауап қайтарылды. Қойылған сауалдардың дені үй, жер алу мәселелері мен аулаларды абаттандыруға қатысты болды. Оған нақты жауап берген Бағдат Әбілмәжінұлы:  «Алдымен үй және жер алу үшін кезекте тұрған азаматтардың сауалына жауап берейін.  Бүгінде  қалада 22 мың 900 адам жер, 15 мыңнан астам тұрғын баспана кезегінде тұр. Жалпы, үй және жер бөлуде арнайы комиссия құрамы жасақталған. Олар оның қаншалықты заңды, заңды емес екенін қатаң қадағалайды. Нақты айтқанда, кімнің кезегі келеді сол адам алады. Берілетін үйлер.  несиелік үй,  коммуналдық үй, жалдамалы үй  болып бөлінеді. Мәселен, өткен жылы 680-нен астам үй берілді. Оның барлығы мемлекет қаражатымен салынған үйлер емес, несиелік үйлер. Несиелік үйлерге Тұрғын үй жинақ банкі арқылы ақша жинап алуға болады. Ал, жер алам деушілер де бәрібір кезек күтеді. Биылғы жылы қаланың батысынан «Жастар-3» шағын аумағынан біраз адамдарға жер бөлу көзделген. Онда да алдыңғы кезектегі адамдар ала алады. Енді, аулаларды жөндеу мәселесіне келсек, жалпы қалада 282 аула бар.Өткен жылы 11 спорт алаңы салынып, 13 аула жасалды. Биылғы жылы  жөнделетін аула санын 100-ге жеткізу жоспарланып отыр. Қазіргі кезде  42 ауланы абаттандыруға қажетті қаражат бөлінді. Қалған аулаларды жөндеуді жеке кәсіпкерлердің қолдауымен жүзеге асырсақ деген ойымыз бар» -деді.

Кездесу соңында жиналған қауым қала әкімінің жұмысына «қанағаттанарлық» деген баға берді.

Бөлісу
Share on FacebookTweet about this on TwitterEmail this to someoneShare on VK